Toshkent xalqaro aeroportida qiymati 245 mln so‘mlik qimmatbaho metall va qimmatbaho toshlardan ishlangan qo‘l soatlari va zargarlik buyumlarining noqonuniy olib kirilishiga chek qo‘yildi. Bu haqda “Toshkent-Aero” ixtisoslashtirilgan bojxona kompleksi xabar berdi.

Jumladan, Pekindan qaytgan yo‘lovchi qiymati 145 million so‘mlik, Dubaydan qaytgan yo‘lovchi esa 60 million so‘mlik qimmatbaho soatni “yashil” yo‘lak orqali olib o‘tishga uringan vaqtida to‘xtatib qolindi. Har ikkala holatda ham soatlar jismoniy shaxslar tomonidan tovarlarni bojsiz olib kirish meʼyoridan ortiqcha bo‘lgan.

“Istanbul–Toshkent” reysi bo‘yicha parvozini yakunlagan yo‘lovchi esa ruxsat etilgan 65 gramm og‘irlikdagi zargarlik buyumlaridan tashqari yana  40 gramm tilla taqinchoqlarni olib kirishga uringan vaqtida fosh qilindi. 

Qiymati 50 million so‘mlik ushbu zargarlik buyumlari shaxsiy ko‘rik davomida yo‘lovchining cho‘ntagida aniqlangan. 

Maʼlumot uchun, jismoniy shaxslarga shaxsiy ehtiyoj uchun 65 grammgacha og‘irlikdagi zargarlik buyumlarini bojsiz olib kirishga ruxsat etiladi. Ammo bu tovarlarni bojsiz olib kirishning umumiy meʼyorlari doirasida bo‘lishi kerak. Masalan, havo yo‘llari orqali O‘zbekistonga kirib kelishda 2 ming dollargacha qiymatdagi tovarlarni bojsiz olib kirishga ruxsat etiladi.

Chegaradan noqonuniy tarzda olib o‘tish holatlari ko‘paymoqda

Avvalroq Sirdaryoda 6,7 kilodan ortiq zargarlik buyumlarini chegaradan yashirincha olib o‘tmoqchi bo‘lgan ayol va uning nevarasi qo‘lga tushgan edi. 

Sentyabr oyida esa Toshkent xalqaro aeroportida qimmatbaho soatni noqonuniy olib o‘tishga urinish, tarkibida kuchli ta’sir qiluvchi modda bo‘lgan qahvani olib kirish fosh etilgandi.

Iyulda esa Toshkent xalqaro aeroportida fuqaro pnevmatik to‘pponcha olib o‘tmoqchi bo‘lgan edi. Bojxona nazoratiga tegishli tartibda taqdim etilmagan, muqobil manbalarga ko‘ra, taxminiy qiymati 700 ming so‘m bo‘lgan jami 1 dona KR-18 rusumli pnevmatik to‘pponcha va Angry BB’s nomli og‘irligi 1 kg bo‘lgan sharsimon shakldagi plastik o‘qlar borligi aniqlandi, deyiladi bojxona kompleksi axborotida.

May oyida esa DXX 1,4 kg oltinni O‘zbekistondan noqonuniy olib chiqib ketayotgan shaxslarni ushlagandi.