Davlat xavfsizlik xizmatining Andijon viloyati bo‘yicha boshqarmasi xodimlari tomonidan viloyat bojxona boshqarmasini jalb qilgan holda tezkor tadbirlar o‘tkazildi.
Jumladan, Andijon shahri va Andijon tumanida yashovchi 39, 27 va 24 yoshli to‘rt nafar shaxs “Do‘stlik” chegara-bojxona posti orqali O‘zbekistondan Qirg‘izistonga zanjir, tish qolipi hamda lom shaklidagi tilla buyumlarni – kiyimlari ichiga yashirgan holda olib chiqib ketishga uringan vaqtlarida ushlangan.
Ekspertiza xulosasiga ko‘ra, ulardan ashyoviy dalil sifatida olingan, asillik darajasi 997 bo‘lgan oltin buyumlar va qotishmalarning jami vazni 556 grammni, umumiy bahosi 474 million 256 ming so‘mni tashkil etadi.
Boshqa holatda esa Izboskan tumanida yashovchi 41 yoshli ayol “Madaniyat” chegara-bojxona posti orqali Qirg‘izistonga chiqib ketayotgan vaqtida to‘xtatilib, tegishli tartibda shaxsiy ko‘rikdan o‘tkazilgan.
Natijada unda yo‘lovchi bojxona deklaratsiyasida ko‘rsatilmagan zanjir va lom ko‘rinishidagi, umumiy vazni 568 grammni tashkil etuvchi, asillik darajasi 992 bo‘lgan oltin borligi aniqlanib, ashyoviy dalil sifatida rasmiylashtirib olingan. Ekspertiza xulosasiga ko‘ra, ushbu tilla buyumlar va quymalarning umumiy bahosi 431 millio 894 ming so‘mni tashkil etadi.
Shuningdek, uning sherigi bo‘lgan – Namangan tumanida yashovchi 41 yoshli ayol ham asillik darajasi 992 bo‘lgan, sof og‘irligi 271 grammni tashkil qiluvchi, 249 million 240 ming so‘mlik zanjir va nostandart quyma tillalarni noqonuniy olib chiqib ketayotgan vaqtida to‘xtatib qolingan.
Aniqlanishicha, qonunbuzarlar oltindan yasalgan buyumlarni Qirg‘iziston orqali Turkiya davlatiga olib ketishni rejalashtirishgan.
Hozirda mazkur shaxslarga nisbatan Jinoyat kodeksining 182-moddasi (bojxona to‘g‘risidagi qonunchilikni buzish) 2-qismi “a” bandi bilan jinoyat ishlari qo‘zg‘atilib, tergov harakatlari olib borilmoqda.
Bundan oldin Buxoro xalqaro aeroportida qadimiy tangalarni olib chiqmoqchi bo‘lgan erkak to‘xtatib qolingani, Samarqandda Kushonlar davriga oid tangalarni chetga olib chiqib ketmoqchi bo‘lgan fuqaro aniqlangani to‘g‘risida xabar berilgandi.
Izoh (0)