Toshkent xalqaro aeroportida qimmatbaho soatni noqonuniy olib o‘tishga urinish, tarkibida kuchli ta’sir qiluvchi modda bo‘lgan qahvani olib kirish fosh etildi. Bu haqda “Daryo”ga “Toshkent-Aero” ixtisoslashtirilgan bojxona kompleksi axborot xizmati xabar berdi.
Moskvadan Toshkentga uchib kelgan o‘zbekistonlik R.D.ning qo‘l va yo‘l sumkalari belgilangan tartibda tekshiruvdan o‘tkazilganda unda bojxona nazoratiga taqdim etilmagan, jismoniy shaxslar tomonidan tovarlarni bojsiz olib kirish me’yoridan ortiq bo‘lgan, muqobil manbalarga ko‘ra taxminiy narxi 104 million 280 ming so‘m bo‘lgan 1 dona Rolex oyster perpetual datejust nomli qo‘l soati borligi aniqlandi.
Hozirda holat yuzasidan surishtiruv harakatlari olib borilmoqda.
Shuningdek, mazkur aeroportda tarkibida kuchli ta’sir qiluvchi modda bo‘lgan salkam 10 ming dona “qahva”lar ham to‘xtatib qolingan.
Islom Karimov nomidagi Toshkent xalqaro aeroporti chegara-bojxona posti xodimlari tomonidan Istanbul—Toshkent yo‘nalishi bo‘yicha uchib kelgan bir guruh o‘zbekistonliklar tegishli tartibda bojxona nazoratidan o‘tkazildi. Fuqarolarning qo‘l yuklari va bagajlari tekshirilganda, bojxona nazoratiga belgilangan tartibda taqdim etilmagan, sifat ko‘rsatkichlarini tasdiqlovchi hujjatlarga ega bo‘lmagan, hech qanday ruxsatnomasiz jami 358 quti ichida 9 210 dona Keto form slimmer coffee nomli bioaktiv moddalarga o‘xshash kukunsimon mahsulotlar borligi aniqlandi. O‘zbekiston Respublikasi IIV ekspert-kriminalistika bosh markazi tomonidan sudga oid kimyoviy ekspertiza xulosalariga ko‘ra, mazkur mahsulotlar tarkibida “sibutramin” va kofein moddalari mavjud bo‘lib, “sibutramin” moddasi Vazirlar Mahkamasining 2023-yil 19-avgustdagi qarorida ko‘rsatib o‘tilgan respublika hududida muomalasi cheklangan kuchli ta’sir qiluvchi moddalar ekanligi ma’lum bo‘ldi. Hozirda mazkur holat yuzasidan bojxona organlari tomonidan Jinoyat Kodeksining tegishli moddalari bilan jinoiy ish qo‘zg‘atilgan, deyiladi “Toshkent-Aero” ixtisoslashtirilgan bojxona kompleksi axborot xizmati bergan xabarda.
Izoh (0)