Samarqanddan Kushonlar davriga oid 5 dona qadimiy tangani olib chiqib ketmoqchi bo‘lgan fuqaro aniqlandi. Bu haqda viloyat bojxona boshqarmasi xabar berdi.
Unga ko‘ra, Samarqand—Vnukovo yo‘nalishidagi aviareys bilan xorijga ketayotgan fuqaro A.A.ning bagaj sumkasi rentgen apparati yordamida bojxona nazoratidan o‘tkazilgan.
Natijada fuqaroning bagaj sumkasidan Kushonlar davriga oid 5 dona qadimiy tanga, 3 dona tarozi kalibrovkasini o‘lchaydigan qadimiy metall hamda 1 donadan 7,62 kalibrli gilza va otilgan o‘q qoldig‘i borligi aniqlangan. Hozirda mazkur holat yuzasidan bojxona organlari tomonidan surishtiruv harakatlari davom ettirilmoqda.
Ma’lumot uchun, ellik yil muqaddam va undan ham oldinroq yaratilgan madaniy boyliklarni O‘zbekistondan olib chiqilishi mumkin emas.