Toshkent viloyati IIBda “Jinoyatchilikni oldini olish va profilaktika kuni” doirasida 1-iyun, payshanba kuni brifing bo‘lib o‘tdi. Brifingda Bo‘ka tumanida yuz bergan jiddiy bosqinchilik jinoyati haqida ma’lum qilindi.
Bo‘ka tumani IIBga kelib tushgan murojaatga ko‘ra, 2017-yil 23-fevraldan 24-fevralga o‘tar kechasi, tungi soat 03:00 da to‘rt nafar noma’lum shaxs tumanda joylashgan “Dashtobod” mahallasidagi uylarning biriga darvoza orqali g‘ayriqonuniy ravishda kirgan. Bu shaxslar uyning yotoqxonasida uxlab yotgan 1992-yilda tug‘ilgan U.N.ga hujum qilib, pichoq bilan qo‘rqitgan va bosh yuz sohalariga bir necha bor urgan. Bosqinchilar jabrlanuvchiga tan jarohati yetkazib, o‘zlari bilan olib kelgan skotch yordamida uning qo‘l, oyoq va o‘gzini bog‘lagan.
Shundan so‘ng noma’lum shaxslar uyda bo‘lgan 5 million 300 ming so‘m naqd pul, zargarlik buyumlari va 700 ming so‘mlik Samsung uyali telefonini qo‘lga kiritib, voqea joyidan yashiringan.
Olib borilgan surishtiruvlar natijasida mazkur bosqinchilik jinoyati U.N.ning mahalladoshi 1974-yilda tug‘ilgan Ulug‘bek Ergashev tomonidan uyushtirilganligi aniqlandi. U o‘zining tanishlari, 1980-yilda tug‘ilgan Abdug‘affor Ashurov, 1973-yilda tug‘ilgan Aleksey Muginov, 1978-yilda tug‘ilgan Ulug‘bek G‘oziyev va 1982-yilda tug‘ilgan Farhod Abdusamatov bilan birga jinoyatni sodir etgan.
Xonadon egasini o‘ziga to‘q yashashini, uyida 5—6 million so‘m saqlashini aytib, Ulug‘bek Ergashev o‘z sheriklarini qiziqtirgan, ularga uyni ko‘rsatib, qanday qilib unga kirish kerakligini tushuntirgan. E’tiborlisi shundaki, jinoyatning tashkilotchisi o‘z sheriklariga U.N. uyida 280 ming AQSh dollari saqlashini aytgan. Bosqinchilar esa uy egasidan ana shu pulni talab qilgan. Bunday miqdordagi pulning uyda yo‘q ekanligini bilgan bosqinchilar qo‘lga kiritilgan pul va buyumlar bilan cheklangan.
Tergov va tezkor surishtiruvlar davomida guruh a’zolaridan biri Farhod Abdusamatov 2017-yil 24-martda Ohangaron tumanida sodir etilgan bosqinchilik jinoyatida ham ishtirok etgani aniqlangan.
Izoh (0)