Samarqandda 19 yoshli ayol 16 yoshli qizni kaltakladi
Samarqand viloyatining Kattaqo‘rg‘on tumanida 13-dekabr kuni A.R. (2005-yilda tug‘ilgan ayol) K.U.ni (2008-yilda tug‘ilgan qiz bola) kaltakladi. Bu haqda Bolalar ombudsmani matbuot xizmati xabar berdi.
Foto: Videodan kadr
Maʼlum qilinishicha, voyaga yetmagan K.U. go‘yoki A.R. haqida nomaqbul gaplar aytganini u boshqalardan eshitgach, A.R. istirohat bog‘ida qizni yerga yotqizib, yuzi va tanasiga musht urgan. Shuningdek, sochidan tortib yerda sudragan va buni atrofdagilar kuzatib turgan.
Holat yuzasidan Kattaqo‘rg‘on tumani IIB tomonidan tergovga qadar tekshiruv olib borilmoqda.
Foto: Videodan kadr
Jarohat darajasini aniqlash maqsadida K.U.ga nisbatan sud-tibbiyot ekspertizasi tayinlangan.
“Voyaga yetmagan qizga nisbatan sodir etilgan bunday zo‘ravonlik harakatlariga qatʼiy qonuniy chora ko‘rilishi shart! Bolalar ombudsmani mazkur holat yuzasidan o‘z kuzatuvini davom ettiradi”, deyiladi xabarda.
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolagani haqida xabarlar tarqalgandi. Surishtiruv davomida yuqoridagi holat tasdig‘ini topmagan. Sirdaryoda ikki o‘quvchi qiz o‘qituvchini urgani aks etgan video tarqaldi. Holat viloyat Maktabgacha va maktab ta’limi boshqarmasi va soha mas’ullari nazoratiga olindi.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Izoh (0)