Toshkentda 3 yoshli bolani shafqatsizlarcha pichoqlab o‘ldirgan shaxs 24 yilga qamaldi (video)

Jinoyat ishlari bo‘yicha Mirzo Ulug‘bek tuman sudida 2024-yilning 8-iyulidan 9-iyuliga o‘tar kechasi soat taxminan 01:00 larda Toshkent shahrining Yashnobod tumanida sodir etilgan mudhish qotillik — 3 yoshli bolani vahshiylarcha o‘ldirgan 31 yoshli fuqaro ishi ko‘rilayotgani xabar berilgandi. Sudning 29-noyabr kuni davom etgan navbatdagi majlisida sudlanuvchiga hukm o‘qildi. 

Sud muhokamasida so‘z olgan prokuror marhum bola qotilligida gumonlangan shaxsga bir umrlik ozodlikdan mahrum qilish jazosi tayinlanishini so‘radi.

Sudlanuvchi 3 yoshli bola qotili deb topildi va unga 24 yil muddatga ozodlikdan mahrum qilish jazosi tayinlandi. 

Sudda aniqlashtirilishicha, 2024-yilning 9-iyul kuni Yashnobod tumanidagi ko‘p qavatli uyda ijara asosida yashab kelayotgan 31 yoshli erkak ushbu manzilda qonuniy nikohdan o‘tmasdan yashab kelgan ayoli bilan nizolashib, uning birinchi turmushidan tug‘ilgan o‘g‘il farzandiga pichoq bilan tan jarohatlari yetkazib, hodisa joyidan yashiringan. Bola shifoxonaga yetmay, vafot etgan.

Sudning dastlabki majlislarida so‘z olgan jabrlanuvchi ayol, marhum bolaning onasi N.N. bolasining qotili deb topilgan eri bilan qotillik voqeasidan bir kun avval urishib qolib, uyiga ketib qolganini, eri onasiga yalinib ularni uyga qaytarganini aytgandi.

Men yashamayman deb ketib qolgandim. Keyin u onamga telefon qilib, “bir onalik qiling, oxirgi marta bo‘ldi, endi hech qachon qizingizni xafa qilmayman” deb yolvorib, onamni ko‘ndirgan va bizning uyga qaytib kelishimizga sababchi bo‘lgandi. Yarim kechasi birlarda men uyga qaytib keldim. Ertasi kuni ertalab kir yuvib yurgan paytim bolam balkonda uxlayotgandi. Shu payt zalda orqamga o‘girilganimda u bolamning yoniga kirib, bolamni chap qo‘lida bo‘g‘di. Yugurib borib undan bolamni olgunimcha pichoq tiqib tashladi. Bolamni olishga uringanimda meni ham urdi. Pichoqni olib bolamni ololmaganimdan keyin men ko‘chaga yugurdim. Yugurganimdan keyin u mening orqamdan yugurib, bolani tashladi. Ungacha bolamni uning qo‘lidan olishga kuchim yetmadi. Ko‘chaga chiqib, yordam bering deb baqirdim. Qo‘shnilar baqir-chaqirni eshitgach, 102 ga xabar qilishgan ekan. Keyin bir necha xodimlar kelib, olib ketishdi. Hech qanday urush bo‘lgani yo‘q edi, shunchaki bizlar qaytib kelgandik. Kechiring deb yashay boshlagandim, degandi ayol qotillik voqeasi ro‘y bergan vaqtni yodga olar ekan.

Marhum bolaning otasi nafaqat sudlanuvchi sobiq ayoli, bolaning onasi N.N. ham psixotrop va narkotik moddalar iste’mol qilib kelganini, bolasiga e’tiborsiz bo‘lganini aytib, suddan ayolga ham chora ko‘rishni so‘ragandi.

Hozir ham ekspertizaga olib borsangiz chiqadi. Men buni bilib yurardim. Tanish-bilishlar aytib berishardi. Buning hech qaysi gapiga ishonish kerak emas. Bir marta bolamni ko‘rishga borganimda bolam uyda bitta o‘zi o‘ynab yurgandi. Uyda hech kim yo‘q, ko‘chaning eshigi ochiq edi. Kirib buning uxlab yotganini ko‘rdim. Kayfdan qotib qolgan. Yuziga urib, tur desam ham turmagan. Keyin bolani olib ketganman. Olib ketganimda 102 ga qo‘ng‘iroq qilib, o‘g‘limni olib ketayotganimni, ertaga o‘g‘irlab ketdi deganda o‘zimni himoyalash uchun aytayotganimni bildirganman. Bola menikida yaxshi yashab yurgandi. U yalinib uzr so‘rab, “bolamni ber, yashay olmayman, o‘lib qolaman”, degani uchun, qolaversa uyda qarashga odam bo‘lmagani uchun qaytarib bergandim. Ona bolaga javobgarda, shu sabab bunga ham chora ko‘ring, degandi jabrlanuvchi.

Sudda so‘z olgan guvohlar, IIB xodimlari qotillik voqeasi sodir bo‘lgan paytda o‘sha xonadonga yetib borishganida bolani qonga belanib yotgan holda ko‘rishganini, qotillik voqeasi shafqatsizlarcha amalga oshirilganini gapirib bergandi. 

“Esimda yo‘q, ko‘p kayf qilib yuborganman. ‘Guluk’da bo‘lganman, hamma biladi. Kechiringlar”, deya qotilligi haqida gapirgandi sudlanuvchi. Uning so‘zlariga “sudlanuvchi ichimga jin kirib qoldi, bolani o‘ldirishimni buyurdi, deyapti”, deya advokati izoh bergandi.

Respublika ruhiy kasalliklar shifoxonasidan kelgan psixolog-ekspertlar sudlanuvchining bilish jarayonlarida yaqqol ifodalangan buzilish jarayonlari aniqlanmaganini aytib, “Fikrlari ketma-ketlikda. Individual psixologik xususiyatlarga ko‘ra, o‘z-o‘zini oqlash tendensiyasining yuqoriligi, egosentrizm kabi xususiyatlar aniqlandi. Tekshiriluvchi ijtimoiy xavfli qilmish sodir etgan vaqtda fiziologik affekt holatida bo‘lmagan”, degandi.