“Liverpul” hujumchisi Muhammad Saloh APL tarixida bir uchrashuvda gol va golli uzatmani eng ko‘p amalga oshirgan futbolchiga aylandi. Bu haqda Squawka xabar bermoqda.
Manbaga ko‘ra, Saloh hozirgacha 37 ta o‘yinda ikki yoki undan ortiq samarali harakat qilgan (kamida bitta gol va bitta golli uzatma). Avvalroq bu ko‘rsatkich bo‘yicha rekord “Everton” va “Manchester Yunayted”ning sobiq hujumchisi Ueyn Runiga tegishli edi. E’tiborlisi, Saloh angliyalik futbolchidan 214 ta kam o‘yin o‘tkazdi.
Eslatib o‘tamiz, “Liverpul” APLning 14-turidan o‘rin olgan “Nyukasl Yunayted”ga qarshi uchrashuvda 3:3 hisobida durang o‘ynadi. Saloh ushbu uchrashuvda dubl qayd etdi va bir golga hammualliflik qildi.
Joriy mavsumda Saloh klub safida barcha turnirlarda 21 o‘yin o‘tkazib, 15 gol urdi va 12 golga assistentlik qildi. Misrlik futbolchining klub bilan shartnomasi 2025-yilning yozida yakuniga yetadi.
Avvalroq klub va futbolchi o‘rtasida yangi shartnoma bo‘yicha muzokaralarda muammolar bo‘layotgani haqida xabar berilgandi.
Izoh (0)