O‘zbekiston fuqarosi Rossiyada qamoq jazosini o‘tab yurgan vaqtida “Vagner” xususiy harbiy kompaniyasi orqali Ukrainaga qarshi harbiy harakatlarda qatnashgani aniqlandi.
“Daryo” muxbiri tanishgan sud hujjatiga ko‘ra, u 2020-yilda Moskva shahriga mavsumiy ishlash maqsadida borgan va o‘sha yerda qasddan odam o‘ldirish jinoyati uchun 2021-yilda 9 yilga ozodlikdan mahrum etilgan.
2022-yil 21-sentyabrda qamoqxonadan jangovar harakatlarda qatnashish sharti bilan chiqarilib, Rossiya Mudofaa vazirligi bilan shartnoma tuzgan va 2023-yil 21-martga qadar Rossiya—Ukraina urushida qatnashgan.
Harbiy xizmatni yakunlagach, u sodir etgan jinoyati uchun Rossiya prezidenti farmoni bilan afv etilgan va medal bilan taqdirlangan. R.D. 2025-yil 9-mart kuni Moskva—Samarqand reysi orqali O‘zbekistonga qaytib kelgan. 11-mart kuni esa o‘z xohishiga ko‘ra DXX Qashqadaryo boshqarmasiga murojaat qilib, Rossiya—Ukraina urushida qatnashganini tan olgan va tegishli hujjatlarni taqdim qilgan.
Aniqlanishicha, u harbiy xizmat uchun vakolatli bo‘lmagan bo‘lsa ham, o‘z manfaatini ko‘zlab, boshqa davlat hududida qurolli to‘qnashuvlarda qatnashgan.
Unga nisbatan 3 yil 6 oy ozodlikni cheklash jazosi tayinlandi.
Ukrainaga qarshi urushda Rossiya armiyasi safida jang qilgan 66 nafar O‘zbekiston fuqarosi halok bo‘lgan. Ma’lumotlarga ko‘ra, Rossiya armiyasi safida jang qilgan xorijliklar 28 ta davlatdan bo‘lgan. Qurbonlar soni bo‘yicha birinchi o‘rinda, katta ehtimol bilan, Shimoliy Koreya fuqarolari turadi. Janubiy Koreya razvedkasi ma’lumotiga ko‘ra, urushda halok bo‘lgan shimoliy koreyaliklar soni 600 nafarga yetishi mumkin. Biroq bu borada rasmiy ma’lumotlar mavjud emas.
Xorijlik qurbonlar ichida Tojikiston fuqarolari (72 kishi) yetakchilik qilmoqda. Ikkinchi o‘rinda O‘zbekiston (66 nafar) fuqarolari turadi. Tojikistondan 43 kishi va O‘zbekistondan 46 kishi qamoq jazosini “nollashtirishga” uringan. Ularning aksariyati “Vagner” xususiy harbiy kampaniyasi bilan shartnoma imzolagan.
Izoh (0)