Malida isyonchi guruhlar mamlakat armiyasi ustidan ulkan g‘alabaga erishgan. Bu haqda mamlakatdagi mahalliy manbalarga tayanib, Al Jazeera nashri xabar berdi.
Manbada aytilishicha, hukumatdan mustaqillik talab qilayotgan, tuareg qabilasi aʼzolaridan tashkil topgan guruhlar hukumat kuchlariga hujum qilib, ularning harbiy pozitsiyalarini egallagan. Milliy armiyaga tegishli katta miqdordagi texnika va qurollarni qo‘lga kiritgan.
Isyonchilar hamda Mali armiyasi o‘rtasidagi shiddatli janglar Jazoir bilan chegarada ro‘y bergan. Uch kunlik jangda tuareg bo‘linmalari koalitsiyasi hukumat kuchlarini o‘rab olib qaqshatqich zarba bergan.
Tinzaouatene tumanidagi janglarda 7 nafar isyonchi halok bo‘lgani, 12 nafari yaralangani xabar qilingan. Hukumat kuchlari ichida yo‘qotish ancha jiddiy bo‘lgani aytilgan bo‘lsa-da, halok bo‘lgan askarlar statistikasi maʼlum qilinmagan.
Tuareglar hujumi oqibatida hukumat qo‘shini bilan birga harakat qilayotgan Rossiyaning “Vagner” bo‘linmasi ham jiddiy yo‘qotishga uchragan. Bo‘linmaning 20 nafar askari kutilmagan hujum oqibatida halok bo‘lgan. Ko‘plab rus askarlari asir olingan.
Mali hukumati isyonchilar qo‘lida zamonaviy qurollar hamda urush olib borish rejasi borligini bildirgan. Mamlakatning ayrim rasmiylari Fransiya hukumati va “Al-Qoida” terroristik guruhini isyonchilarga taʼminot yuborganlikda ayblagan.
Maʼlumot o‘rnida tuareg qabilasi 2012-yildan beri hukumatga qarshi harbiy harakatlar uyushtirib keladi. Ular Kidal shahri va unga tutash shimoliy hududlarga mustaqillik berish va qo‘shinlarni olib chiqib ketishni talab qilib kelgan.
Malida Polkovnik Assimi Goita boshchiligida 2020-yilda davlat to‘ntarishi amalga oshirildi. Hokimiyatni egallagan Goita 2022-yilda fransuz qurolli kuchlarini mamlakatdan haydab chiqardi. U mamlakat birligini talab qildi va hech kimga muxtoriyat berilmasligini qatʼiy taʼkidladi. Bu esa mamlakat ichidagi ayirmachi kuchlarni faollashtirib yubordi.
Mali hukumati tuareglarda va xorijiy mamlakatlarda o‘ziga qarshi dushmanlik kayfiyatini sezgach, yordam so‘rab Rossiyaning “Vagner” yollanma askarlari guruhiga murojaat qildi. Bunga javoban Mali shimolida rus harbiy shtabi bazasi tashkil etilgan.
Izoh (0)