Rossiyaning Ukrainaga qarshi urushida Rossiya Mudofaa vazirligi bilan shartnoma tuzmagan ishtirokchilar jangovar faxriylar uchun mo‘ljallangan nafaqa va boshqa davlat yordamini oladi. Kreml saytida 25-yanvar kuni e’lon qilingan hujjatga ko‘ra, prezident Vladimir Putin Rossiya hukumatiga 1-aprelgacha qonunchilikka tegishli o‘zgartirishlar kiritishni topshirgan.
“Rossiya federatsiyasi me’yoriy-huquqiy hujjatlariga harbiy harakatlarda qatnashgan shaxslarga maxsus harbiy operatsiya paytida jarohat yoki kasallik olganini tasdiqlovchi hujjatlar asosida jangovar faxriy maqomini berishni nazarda tutuvchi o‘zgartirishlar kiritilsin”, — deb ko‘rsatilgan buyruqda.
“Vagner” yollanma askarlari
Rossiyaning Ukrainaga qarshi deyarli ikki yildan beri davom etayotgan urushi paytida “Vagner” xususiy harbiy kompaniyasining ko‘plab yollanma askarlari Mudofaa vazirligi bilan shartnoma imzolamagan. 14-dekabr kuni “to‘g‘ridan to‘g‘ri muloqot” paytida sobiq “vagnerchilar”dan biri prezidentga xususiy harbiy kompaniya ishtirokchilari tomonidan faxriy maqomini olish imkoniyati haqida savol berdi. Putin “vagnerchilar” boshqa barcha jangovar harakatlar ishtirokchilari kabi imtiyozlar va davlat tomonidan qo‘llab-quvvatlanish huquqiga ega ekanini aytdi.
“Vagnerchi”larning ko‘plab qarindoshlari 2023-yilning yozida VK ijtimoiy tarmog‘ida “Zashchitniki otechestva” davlat jamg‘armasi guruhi izohlarida “Vagner”ning aksariyat yollanma askarlariga jangovar faxriy guvohnomalari berilmayotgani haqida shikoyat qila boshladi. Ushbu hujjatsiz jangchilar davlat tomonidan imtiyozlar va qo‘llab-quvvatlash, jumladan, kompleks tibbiy, psixologik va ijtimoiy reabilitatsiya, sanatoriy-kurortda davolanish va yuridik yordam olish huquqiga ega bo‘lmaydi.
Izoh (0)