“Vagner” xususiy harbiy kampaniyasi Ukrainadagi urushga kamida 48 366 mahbusni yollagan. Bu haqda halok bo‘lgan yollanma askarlarning oilalariga to‘lovlar bo‘yicha ichki hujjatlarga tayanib, “Mediazona” jurnalistlari va BBC xabar berdi.
“Vagner”ning aviahalokatda vafot etgan rahbari Yevgeniy Prigojin 2022-yil yozida Rossiya koloniyalariga borib, mahbuslarga avf evaziga urushga yuborishni taklif qila boshlagan. Bir necha oy o‘tgach, Rossiya Mudofaa vazirligi ham xuddi shunday yo‘l tutgan. 2023-yil oxiriga kelib, “Vagner” mahbuslarni urushga yollashni to‘xtatgan.
Yollanma askarlarning aksariyati Baxmut uchun janglarda halok bo‘lgan. U yerda “Vagner” 19,5 ming kishini yo‘qotgan, ulardan 17,1 ming nafari mahbuslar, 2,4 ming nafari esa “erkin” yollanma askarlardir. “Vagner” rasmiylari qattiq rejimdagi 227 ta koloniyadan 33 ming kishini olib ketgan. Ulardan 21 ming nafari Baxmutdan omon qolib, Rossiyaga qaytgan. “Vagner” 75 ta umumiy rejimli koloniyalarga va 28 ta maxsus rejimli koloniyalarga tashrif buyurgani aniqlangan.
Izoh (0)