Braziliyaning “Palmeyras” klubi yarim himoyachisi Richard Rios faoliyatini “Roma”da davom ettirishi mumkin. Insayder Nikolo Skira xabariga ko‘ra, Rim klubi 25 yoshli futbolchi bilan shartnoma bo‘yicha kelishuvga erishgan.
Ma’lumotlarga ko‘ra, Rios “Roma” bilan 2030-yil yozigacha mo‘ljallangan bitim imzolaydi va yiliga 2,6 million yevro maosh oladi. “Roma” transfer uchun “Palmeyras”ga 23–25 million yevro atrofida taklif bermoqda.
Transfermarkt portali Richard Riosning bozor qiymatini 16 million yevroga baholagan. Avvalroq kolumbiyalik futbolchiga “Manchester Yunayted” va “Inter” klublari ham qiziqish bildirgan edi.
Eslatib o‘tamiz, Rios yaqinda “Palmeyras” bilan Klublar o‘rtasidagi Jahon chempionatining chorak finaliga qadar yetib bordi. Turnir davomida u 5 o‘yinda maydonga tushib, 2 ta golli uzatmaga mualliflik qildi.
Agar muzokaralar yakunlansa, Richard Rios “Roma”ning yozgi transfer oynasidagi asosiy xaridlaridan biriga aylanishi mumkin.
Izoh (0)