Futbol tarixida bir klub bilan tarix yarata olgan futbolchilarni ko‘plab uchratishimiz mumkin. Ularning orasida mashhur futbolchilardan tashqari, siz bilmagan katta klublarda o‘ynashdan bosh tortib, kamtargina klubi uchun butun hayotini bog‘lagan futbolchilar mavjud.
Said Bey 1912-yilda Istanbulda tug‘ilgan. Futbolga bo‘lgan muhabbat uni ingliz dengizchilari shahriga yetakladi. Keyin esa u Usmon imperiyasining boshqa porti - Izmirda to‘xtadi. Said futbol o‘ynash uchun hamma narsadan voz kechdi. U raqibdan to‘pni tez olib qo‘yar edi, shuning uchun Said himoyachi pozitsiyasini egalladi. Uning faoliyatidagi birinchi va yagona klub Izmir shahrining “Oltinordu” jamoasi bo‘ldi. Said 27 yilni ushbu jamoada o'tkazadi va bu jihatdan u jahonda yetakchi hisoblanadi. Said Bey klub tarkibida 44 yoshgacha o‘ynab, 800 ta bahsda maydonga tushdi.
Ammo 30-yillarning boshidan 50-yillarning o‘rtalarigacha bo‘lgan davrda turk futbolining saviyasi yuqori emas edi. “Oltinordu” faqat Izmir futbol ligasida mahalliy kuboklarni qo'lga kiritgan va hozirda quyi liga autsayderi hisoblanadi. Faqat bir marta Said butun Turkiyada eng zo‘ri deb e‘tirof etildi. “Galatasaroy” va “Beshiktosh” o'sha paytda eng kuchli edi, ammo Izmir klublari hiyla ishlatishga qaror qilishdi.
Ular uchta jamoani birlashtirib yagona jamoa sifatida musobaqaga kirishdi. Ammo Saidning gollariga qaramay, ular oxirgi o'rinni egallashdi. “Galatasaroy“ afsonasi Metin O'qtay “Oltinordu” hujumchisiga alohida e‘tirof etdi. Klub egalari futbolchini qimmat restoranlarda kechki ovqatga taklif qilishdi va unga bo‘sh chek taqdim etildi. Afsonaga “Galatasaroy” tarkibiga o‘tishi uchun xohlagan oylikni yozishi mumkinligi aytildi. Said har doim yaxshi takliflarni rad etib kelgan. Uning daromadi ba’zida non va zaytundan bo‘lak hech narsaga yetmagan vaqtlar ham bo‘lganiga qaramay, klubini tark etmagan.
1934-yilda Turkiyada "familiya to‘g‘risidagi qonuni” qabul qilinganida, futbolchi Said Bey “Oltinordu” familiyasini oldi. Boshqa turk klublarining afsonalari ham shunday qilishgan. Yuz yil o'tgach, ba‘zilar klub futbolchi nomiga nomlangan deb ham o‘ylashi mumkin, aslida buning aksi. Saidning faoliyati futbolda kamdan-kam uchraydigan sadoqat namunasidir. Transferlar qadimdan bo‘lib kelgan. Lekin sodiq futbolchilar orasida kamtar turk ajralib turadi. Said Bey buyuk Maldiniga bir klubda mavsumlar bo'yicha jahon rekordini o'rnatishiga imkon bermadi.
Maldini va Totti - eng sodiq futbol yulduzlari
Paolo va Franchesko boshqa klublardan ko'p marotaba jozibali taklif olishgan. “Milan” va “Roma” har doim ham yorqin jamoalar bo‘lishmagan, lekin italiyaliklar doim jamoasiga sodiq qolishdi. Maldini uchun bu osonroq bo'ldi, chunki Paolo otasining ortidan jamoada qoldi. “Milan” ayyor xo'jayini Berluskoni tufayli dunyoning eng yaxshi jamoalaridan biri bo‘lgan. Tottining holati biroz murakkab. Futbolchi “Roma” bilan juda ko‘p qiyinchiliklarga uchragan, faqatgina bir martagina Totti sevimli jamoasi bilan “Skudetto”ni qo‘lga kiritdi.
Ammo Totti gollar soni bo‘yicha Italiya “A” seriyasi rekordchisi hisoblanadi. U va Maldini 25 yil umrini futbolga bag‘ishladi. Bundan ortiq natijaga yuqorida keltirib o‘tgan turk futbolchisidan tashqari, “Klub Fransez” jamoasi hujumchisi Kanele ham erishgan. Fernand Kanele jamoasi bilan 26 yil birga futbol o‘ynagan.
Yulduzlar haqida gap ketganda “San Paulu” darvozaboni Seni va “Liverpul”ning shotlandiyalik hujumchisi Liddelani ham e’tirof etish zarur.
Angliyada rekord Rayan Giggzga tegishli, u “Manchester Yunayted” safida 24 mavsum harakat qilgan. Uning notinch shaxsiy hayoti bilan bu natijaga erishgani tahsinga loyiq. Bu yerda “Manchester Yunayted”ning boshqa bir afsonasining gaplarini eslab o‘tish kerak.
“Siz turmush o‘rtog‘ingiz, siyosiy yoki diniy qarashlaringizni o‘zgartirishingiz mumkin, ammo sevimli klubingizni o‘zgartira olmaysiz”, — degan edi Kantona.
Bu gap uning tomonidan aytilganini to‘liq isbotlash qiyin, sababi Kantonaning o‘zi sadoqat namunasi emas.
APLda klubiga sodiq futbolchilar qatoriga Terri, Lempard, Jerardni kiritishimiz mumkin.
Agar biz Jahon Chempionlari darajasida gapiradigan bo'lsak, sadoqat borasida faqatgina Tomas Myuller ajralib chiqadi. Unda o'nlab xorijiy takliflar bo'lgan, biroq u har safar “Bavariya” bilan shartnomasini uzaytirgan.
Hozir Myunxen klubi qiyin kunlarni boshdan kechirmoqda va forvard “Bayer”dan mag‘lubiyatga uchragan kuni jamoadoshlarini qattiq tanqid qildi. Albatta, sadoqat ba’zida ana shunday mag‘lubiyatlarni qabul qilishga majbur qiladi.
Yuqorida keltirilgan futbolchilar o‘z klublarida faoliyatining so‘ngigacha sodiq qolishdi. Bu esa yoshlar uchun o‘rnak. Ularga katta pul yoki trofeylarga erishish imkoni taklif qilinganda ham ular “yo‘q” deyishga o‘zlarida kuch topishdi. To‘g‘ri, jamoasini o‘zgartirib, yulduz futbolchilarga aylangan sportchilar ham yo‘q emas. Masalan, Pele, Messi, Ronaldu yoki Zidan yangi jamoalarga o‘tib ko‘proq natijalarga erishgan.
Shunga qaramay sadoqatli futbolchilar futbol tarixining alohida burchagidan o‘rin egallashadi.
Izoh (0)