Choy dunyo bo‘ylab eng ko‘p iste’mol qilinadigan ichimliklardan biri sanaladi. Uning yuzlab turlari va ichish uslublari mavjud: kimdir uni sut bilan ichadi, boshqasi shakar soladi, ba’zilar esa faqat bargli choyni afzal ko‘radi. Ammo shakarli choy nafaqat ta’m jihatidan yoqimli, balki sog‘liq uchun ham foydali bo‘lishi mumkin, deya ta’kidlaydi choy bo‘yicha ekspert Natalya Larionova.
Nega choyga shakar qo‘shish tavsiya etiladi?
Mutaxassis aytishicha, shirin choy tanani tezda tetiklashtiradi. Bu qon tarkibida glyukoza darajasining oshishi bilan bog‘liq bo‘lib, uning ta’siri qisqa muddatli bo‘lsa-da, ayni paytda foydalidir. Shu bois, organizmda kuchsizlik yoki bosh aylanishi kabi holatlar kuzatilganda, aynan shakarli choyni ichish tavsiya etiladi. Bunday vaziyatlarda oddiy, shakar qo‘shilmagan choy yetarli darajada yordam bera olmaydi.
Bundan tashqari, shakar choyning ta’m xususiyatlariga ham muayyan ta’sir ko‘rsatadi. Yengil damlangan choyda u ta’m va hidni kuchaytiradi, kuchliroq va tanninlarga boy navlarda esa shakar achchiq mazani kamaytirib, yumshoqroq ta’m beradi.
Ma’lumot o‘rnida: ayrim insonlarda kuchli damlangan qora choyni iste’mol qilishni xush ko‘radi, bu odat ko‘z bosimi baland bo‘lganlarga salbiy ta’sir qilishi mumkin. Shuning uchun bu guruhdagi insonlarga achchiq choyni ehtiyotkorlik bilan ichish tavsiya etiladi.
Shuningdek, choyni me’yoridan ortiq iste’mol qilish tananing suvsizlanishiga olib kelishi mumkin. Bunga choyning siydik haydovchi xususiyati sabab bo‘ladi. Sut qo‘shilganda bu ta’sir yanada kuchayadi. Shu sababli ayniqsa issiq ob-havoda, choy ichilgach, tanadagi suyuqlik yo‘qotilishini qoplash uchun albatta bir stakan oddiy suv ichish tavsiya etiladi.
Izoh (0)