Gruziyada 25-iyul kuni NATOga a’zo 7 ta davlat harbiylari ishtirokida Agile Spirit nomli harbiy mashg‘ulotlar boshlandi. Rasmiy ochilish marosimi Tbilisiga yaqin joylashgan NATO-Gruziya qo‘shma tayyorlov va baholash markazida bo‘lib o‘tdi. Bu haqda Deutsche Welle xabar berdi.
Mashg‘ulotlarda NATO davlatlaridan tashqari Gruziya, Ukraina va Moldova askarlari ham ishtirok etmoqda. Umumiy hisobda 2 mingdan ortiq harbiy jalb qilingan.
Mashg‘ulotlar doirasida dala sharoitida o‘quv mashqlari, otishma va maxsus kuchlar ishtirokida amaliy harakatlar o‘tkazilishi rejalashtirilgan. Shuningdek, mashg‘ulotlarning bir qismi Turkiyada ham bo‘lib o‘tadi. Bu harbiy tayyorlarlik 8-avgustga qadar davom etadi.
Gruziya Mudofaa vazirligi ma’lumotiga ko‘ra, Agile Spirit mashg‘ulotlarining asosiy maqsadi — ishtirokchi davlatlar armiyasining jangovar tayyorgarligini oshirish, hamkorlik va tezkor harakatlar bo‘yicha tajriba almashishdir.
NATO va Yevropa Ittifoqi Qora dengiz mintaqasida Rossiyaning ta’siriga qarshi harakat sifatida o‘z ishtirokini kuchaytirishga intilmoqda. Ma’lumki, Rossiya 2008-yilda Gruziyaga bostirib kirgan va hozirda mamlakat hududining 20 foizi rossiyaliklar nazorati ostida.
Gruziya 2008-yildan beri NATOga a’zolikni da’vo qilib keladi. U, shuningdek, YI a’zoligiga nomzod sifatida ham tan olingan. Biroq Gruziyada so‘nggi paytlarda qabul qilingan ba’zi ziddiyatli qonunlar, xususan “xorijiy agentlar” to‘g‘risidagi qonun, YI bilan integratsiyani sekinlashtirmoqda.
Izoh (0)