Amerikalik olimlar keng ko‘lamli va uzoq muddatli tadqiqot o‘tkazib, qahvaning ayollar salomatligiga ta’sirini o‘rgandi. Natijalar shuni ko‘rsatdiki, har kuni ertalab ichiladigan bir piyola qahva ayollarni nafaqat tetiklantiradi, balki sog‘lom qarish jarayoniga ham yordam beradi.
Tadqiqot doirasida 30 yil davomida qariyb 50 ming ayolning hayoti kuzatib borildi. Olimlar ularning ovqatlanish odatlari va turmush tarzini to‘liq o‘rganib, har to‘rt yilda ma’lumotlarni yangilab keldi. Qahva, choy va gazli ichimliklar orqali olinadigan kofein miqdori maxsus so‘rovnomalar javobi asosida baholandi.
Tadqiqot shuni ko‘rsatdiki, o‘rta yoshda (taxminan 45–60 yosh oralig‘ida) kofeinli qahvani muntazam ichgan ayollar qariganda ham jismoniy, ham aqliy salohiyatini yaxshi saqlab qolgan. Tarkibida kofeini bor boshqa ichimliklar — choy va kola kabilar bunday ijobiy ta’sir ko‘rsatmadi.
Tahlil uchun ishtirokchilar har kuni iste’mol qiladigan har 80 milligramm kofein ko‘rib chiqildi. Bunda tana vazni, chekish, spirtli ichimliklar iste’mol qilish, jismoniy faollik, ta’lim darajasi va ratsiondagi oqsil kabi boshqa omillar ham hisobga olindi.
Ma’lumotlar 1984-yildan boshlab to‘plangan. 2016-yilga kelib 3706 nafar ayol sog‘lom qarish mezonlariga javob bergan. O‘rta yoshda ular kuniga o‘rtacha 315 milligramm kofein iste’mol qilgan — bu taxminan uchta kichik yoki bir yarim katta finjon qahvaga teng. Kofeinning 80 foizdan ortig‘i aynan qahva orqali olingan.
Qahvaning har bir qo‘shimcha piyolasi sog‘lom qarish ehtimolini 2–5 foizga oshirgan. Shunday qilib, kuniga besh kichik yoki taxminan ikki yarim katta finjon qahva iste’mol qilish keksalikda sog‘lom bo‘lish ehtimoli yuqoriligi bilan bog‘liq bo‘lgan.
Sog‘lom qarish tushunchasi deganda 70 yoshdan oshgach ham sog‘lom hayot kechirish, ya’ni surunkali kasalliklardan xoli bo‘lish, jismoniy faollikni saqlab qolish, aqliy va ruhiy jihatdan barqaror bo‘lish hamda xotira bilan bog‘liq muammolarga duch kelmaslik tushuniladi.
Izoh (0)