Eron o‘t ochishni to‘xtatish bo‘yicha sulhga erishilgach, Isroilni hujumlarni to‘xtatishga va mag‘lubiyatini tan olishga majbur qilganini ta’kidladi. Bu haqda Eron Xavfsizlik kengashi xabar berdi.
Eron va Isroil o‘rtasida o‘t ochishni to‘xtatish Toshkent vaqti bilan 10:00 da kuchga kirdi.
Biz dushmanni pushaymon bo‘lishga, mag‘lubiyatni tan olishga va tajovuzni bir tomonlama to‘xtatishga majbur qildik. Bizning qurolli kuchlarimiz dushmanning har qanday harakatlariga qat’iy va og‘riqli javob berishga tayyor, deyiladi Xavfsizlik kengashi bayonotida.
Shuningdek, bayonotda Eron armiyasining “qo‘li haligacha tepki ustida” turgani qayd etilgan. Eron tashqi ishlar vaziri Abbos Aroqchi “Isroilni tajovuzkorligi uchun jazolash” bo‘yicha harbiy operatsiya yakunlanganini aytgan.
Barcha eronliklar bilan birgalikda jonajon yurtimizni so‘nggi tomchi qoni qolguncha himoya qilishga tayyor turgan va dushmanning har qanday hujumiga so‘nggi daqiqagacha javob qaytargan jasur Qurolli kuchlarimizga minnatdorlik bildiraman, deb yozgan u X ijtimoiy tarmog‘ida.
Isroil hukumati ham o‘z bayonotida tomonlar o‘rtasida o‘t ochish to‘xtaganini tasdiqlagan. Eronga qarshi harbiy operatsiyaning barcha maqsadlariga erishilgani — yahudiy davlati uchun ekzistensial tahdid bartaraf etilgani ta’kidlangan. Sulh AQSH prezidenti Donald Trampning taklifi bilan amalga oshgan.
“Sher jasorati bilan” operatsiyasi Isroil davlatining buyuk tarixiy yutug‘i bo‘lib, bizni dunyo davlatlari qatoriga olib chiqdi. Bu Isroil xalqi va askarlarining buyuk g‘alabasidir, deyiladi Isroil Vazirlar Mahkamasi bayonotida.
Eron bilan 12 kun davom etgan mojaroda 28 nafar isroillik halok bo‘lgani, yana mingdan ortig‘i turli darajada jarohatlangani ma’lum qilindi. Islom respublikasida esa mojaro boshidan buyon 400 nafar qurbon qayd etilgan. Ulardan 13 nafari bolalardir.
Izoh (0)