AQSH prezidenti Donald Tramp internet va ijtimoiy tarmoqlarda vaqt sarflash o‘rniga davlat rahbari sifatidagi vazifalarini bajarishga e’tibor qaratishi lozim. Bunday fikrni Braziliya yetakchisi Luis Inasiu Lula da Silva bildirdi, deya xabar bermoqda G1 portali.
“AQSH kabi ulkan davlat prezidenti mavjud bo‘lgan bu notinch dunyoda o‘zi aytayotgan so‘zlarini o‘ylab gapirishi, internetda kamroq vaqt o‘tkazishi va davlat rahbari vazifalarini bajarishga ko‘proq vaqt ajratishi kerak”, degan Luis Inasiu Lula da Silva.
Shuningdek, Braziliya prezidenti Tramp erkin savdoni rivojlantirish, ko‘p tomonlama munosabatlarni mustahkamlash va tinchlikka erishish haqida ko‘proq qayg‘urishi lozimligini ta’kidlagan.
79 yoshli Braziliya prezidenti Trampni tanqid qilishi birinchi marta emas. Bundan avval u Trampning boshqa mamlakatlar ichki ishlariga aralashish huquqi yo‘qligini aytgan edi. Uning fikriga ko‘ra, Oq uy rahbari ko‘p qutbli dunyoni ham shubha ostiga qo‘ymoqda va butun dunyoni umumiy tartibsizlikka olib kelishi mumkin.
Shuningdek, Lula da Silva AQSHning himoyachilik savdo siyosatini keskin qoraladi va Rossiya bilan hamkorlikni kuchaytirish niyatida ekanligini bildirgan.
Fevral oyida Trampning G‘azo sektoridagi vaziyat haqidagi bayonotlariga izoh berar ekan, Lula da Silva Amerika yetakchisi “dunyoni boshqarish” uchun emas, balki Qo‘shma Shtatlarni boshqarish uchun saylanganini eslatib o‘tgan.
Izoh (0)