Parijdagi “Greven” muzeyidan Fransiya prezidenti Emmanuel Makronning mum haykali o‘g‘irlab ketildi. Bu haqda BFMTV telekanali xabar berdi.
Manbaga ko‘ra, Emmanuel Makronning mum haykali 2-iyun dushanba kuni ertalab Parijning 9-okrugida joylashgan “Greven” muzeyidan o‘g‘irlangan.
Dastlabki tergov natijalariga ko‘ra, muzeyga sayyoh qiyofasida tashrif buyurgan ikki ayol va bir erkak keyinchalik muzey xodimi libosiga o‘rangan. Ular 40 ming yevro qiymatidagi mum haykalni olib chiqib ketgan.
O‘g‘rilar eksponatni favqulodda chiqish yo‘lidan olib o‘tib, adyol ostiga yashirib, qochib ketishgan.
Keyinroq o‘zini Greenpeace faoli deb tanishtirgan shaxs muzey bilan bog‘lanib, aksiya uchun javobgarlikni o‘z zimmasiga olgan. Muzey ma’muriyati politsiyaga murojaat qilgan.
Telekanal xabariga ko‘ra, huquqbuzarlar haykal bilan Parijdagi Rossiya elchixonasi binosiga borib, u yerda Fransiya va Rossiyaning iqtisodiy hamkorligiga qarshi qisqa muddatli namoyish o‘tkazishgan.
Parijdagi Monmartr tepaligida joylashgan “Greven” muzeyi 1882-yilda Buyuk Britaniyaning Tyusso xonim mum haykallari muzeyi namunasida tashkil etilgan. Uning kolleksiyasida asosan Fransiya tarixi va madaniyatini aks ettiruvchi 450 ga yaqin personaj mavjud.
Izoh (0)