Isroil 30-may kuni bir qancha arab tashqi ishlar vazirlarining bosib olingan G‘arbiy Sohilga safarini ta’qiqladi. Saudiya Arabistoni bunga javoban mamalakatni ekstremizm va tinchlikni rad etishda aybladi. Bu haqda Al Jazeera xabar berdi.
Saudiya tashqi ishlar vaziri Faysal bin Farhan Al Saud bunday ayblovlarni Ummonda Misr, Iordaniya va Bahrayn vazirlari bilan birgalikda o‘tkazilgan matbuot anjumanida ilgari surgan
“Isroil qo‘mita a’zolarining G‘arbiy Sohilga safarni rad etishi uning ekstremistik pozitsiyasini va tinchlikka jiddiy yondashmasligini ko‘rsatadi. Bu bizning xalqaro hamjamiyat oldidagi diplomatik harakatlarimizni ikki barobar kuchaytirishga sabab bo‘ladi”, dedi Saudiya tashqi ishlar vaziri.
Misr, Iordaniya, Qatar, Saudiya va BAA vazirlari Falastin prezidenti Mahmud Abbos bilan uchrashishni rejalashtirgan edi. Bu safar Falastin diplomatiyasini qo‘llab-quvvatlash maqsadida tashkil etilgan edi. Ayni paytda Isroil G‘arbiy Sohilning havo hududi va chegaralarini nazorat qiladi. Yahudiy davlati 30-may kuni bu safarga ruxsat bermasligini e’lon qilgan. Iordaniya tashqi ishlar vaziri Ayman Safadiy bu qarorni Arab-Isroil tinchlik bitimini buzish uchun yana bir qadam deb atadi.
“Falastin ma’muriyati Ramallohda arab davlatlari tashqi ishlar vazirlarining Falastin davlatini tashkil etishni targ‘ib qilish masalalarini muhokama qilish uchun provokatsion uchrashuvini o‘tkazmoqchi. Isroil bu tashrifni qo‘llab-quvvatlamaydi”, dedi Isroil rasmiyi.
17—20-iyun kunlari Nyu Yorkda Fransiya va Saudiya tomonidan hamkorlikda tashkil etiladigan xalqaro konferensiya bo‘lib o‘tishi rejalashtirilgan. Unda Falastin davlatini barpo etish masalasi muhokama qilinishi kutilmoqda.
Misr tashqi ishlar vaziri Badr Abdelatiy esa konferensiyada G‘azoda sulhdan keyingi xavfsizlik choralarini va Falastin hududining tiklanish rejalari ko‘rilishini aytgan. Unda falastinliklarni o‘z yerlaridan haydashga qarshi choralar ham ko‘rib chiqilishi kutilmoqda.
Izoh (0)