Fransiyaning “PSJ” klubi UEFA Chempionlar Ligasi finalida erishgan g‘alabani nishonlash chog‘ida sodir bo‘lgan tartibsizliklarda ikki kishi halok bo‘ldi. Bu haqda TF1 Info xabar berdi.
Ma’lum qilinishicha, tartibsizlar oqibatida 192 kishi jarohat olgan. Daks kommunasida (Landa departamenti) 17 yoshli yigit ko‘krak qafasiga pichoq urilishi oqibatida halok bo‘lgan. Gumonlanuvchi qidiruvga berilgan.
Parijning 15-okrugida esa “PSJ“ fanatlari boshqaruvidagi avtomobil skuterni urib yuborgan, haydovchi halok bo‘lgan. Avtomobil voqea joyini tark etgan. Fransiya poytaxtida 559 kishi, jumladan 491 nafar voyaga yetmaganlar qo‘lga olingan.
Shuningdek, 320 kishi hibsga olingan, ulardan 254 nafari Parijda ushlangan. Ichki xavfsizlik organlarining 22 nafar xodimi yaralangan. 7 nafar o‘t o‘chiruvchida tan jarohatlari qayd etilgan. Tartibsizliklar chog‘ida 692 ta yong‘in qayd etilgan, 264 ta yong‘inda avtomobillarga zarar yetgan.
“PSJ”ning UEFA Chempionlar Ligasidagi yirik g‘alabasi
31-may kuni “PSJ” Yevropa Chempionlar Ligasi finalida Italiyaning “Inter” klubini yirik 5:0 hisobida mag‘lub etdi. Yevrokuboklar mavsumining asosiy o‘yini “Arena Myunxen”da bo‘lib o‘tdi.
“PSJ” ilk bor Yevropa Chempionlar Ligasi kubogini qo‘lga kiritdi. Bungacha ushbu nufuzli sovrinni faqatgina bir fransuz klubi — “Marsel” 1993-yilda olgandi. O‘sha g‘alaba ham Myunxendagi stadionda qo‘lga kiritilgandi.
Fransiyada 2024/25-yilgi Chempionlar Ligasi finalidan keyin tartibsizliklar avj oldi. Mamlakat poytaxtida 5 400 nafar politsiya va jandarmeriya xodimlari safarbar qilindi. Huquq-tartibot idoralari ma’lumotlariga ko‘ra, bir necha kishi Yelisey maydonidagi poyabzal do‘koniga bostirib kirib, uni talon-taroj qilgan.
Grenobl markazida avtomobil urib ketishi oqibatida kamida to‘rt kishi jarohatlangan. Avtomobil haydovchisi tramvay yo‘lida katta tezlikda harakatlangan. AFP agentligi ma’lumotlariga ko‘ra, u politsiyaga taslim bo‘lgan va hibsda qolmoqda.
Izoh (0)