Fransiyada 299 nafar bolani zo‘rlashda aybdor deb topilgan sobiq jarroh 20 yilga ozodlikdan mahrum etildi. Bu haqda The Independent xabar berdi.
Ayblanuvchi 74 yoshda Joel Le Skuarnek bo‘lib, u 1989-yildan 2014-yilgacha pedofillik qilgan. Jumladan, o‘ttiz yilga yaqin vaqt davomida 158 nafar o‘g‘il va 141 nafar qizni zo‘rlagan. Jabrlanganlar o‘rtacha 11 yoshda bo‘lgan. Erkak voyaga yetmaganlarga jinsiy tajovuz qilganida bemorlar kasalxonada yolg‘iz bo‘lgan. Ba’zi bolalar o‘sha paytda hushsiz bo‘lgan va nima bo‘lganini eslay olmagan.
Shifokorga nisbatan sud jarayoni 2025-yil boshida boshlangan. Ayblanuvchi barcha bandlar bo‘yicha o‘zini aybdor deb tan olgan.
Ular yosh bola edi... Bu jarohatlarni tuzatib bo‘lmasligini bilaman. Men o‘tmishga qayta olmayman, biroq bu insonlar va ularning yaqinlari oldida harakatlarim uchun javobgarlikni o‘z zimmamga olaman, deb aytgan Le Skuarnek.
U 2020-yildan beri to‘rt nafar bolani, jumladan, ikki nafar jiyanini zo‘rlagani uchun jazo muddatini o‘tamoqda. O‘shanda sud uni 15 yilga ozodlikdan mahrum qilgan edi. Sudning yangi hukmi bilan erkak 20 yilga ozodlikdan mahrum etildi.
Bu ish Fransiya tarixida jabrlanganlar soni bo‘yicha bolalarga nisbatan zo‘ravonlik bo‘yicha eng yirik ish bo‘ldi. Le Skuarnek tomonidan zo‘ravonlikka uchraganida 10 yoshda bo‘lgan jabrlanuvchilardan biri Fransiya qonunlarini o‘zgartirish kerakligini aytdi.
U atigi 20 yilga qamaldi. Qo‘shma Shtatlarda u minglab yil qamoqda o‘tirardi. Bunday odamning ozodlikka chiqishi mumkinligi chidab bo‘lmas hol, dedi u.
Fransiyada pedofiliya bilan bog‘liq jinoyatlar uchun eng og‘ir jazo — 20 yilgacha ozodlikdan mahrum qilishdir. 2021-yilda qabul qilingan qonunga ko‘ra, 15 yoshga to‘lmagan bolalar bilan jinsiy aloqa avtomatik ravishda zo‘rlash deb baholanadi va bu jinoyat uchun maksimal jazo 20 yil qamoq hisoblanadi.
Izoh (0)