Shavkat Mirziyoyev 16-iyun kuni tinchlik, adolat va inson qadrini ulug‘lashga bo‘lgan ehtiyoj har qachongidan ham oshib borayotganini aytdi.
Amalga oshirilayotgan islohotlar natijadorligi, hududlarda ishlarning borishi, aholini o‘ylantirayotgan masalalarga yechim topish yuzasidan prezident raisligidagi videoselektor yig‘ilishida qayd etilishicha, o‘tgan besh oyda mamlakatda sanoat 6,4 foizga o‘sdi, eksport 18 foizga, xorijiy investitsiyalar 46 foizga oshdi. Qiymati 3 milliard dollarlik 2,5 mingdan ziyod yangi quvvatlar ishga tushdi, 2 million 400 ming odam daromadli bo‘ldi.
“Lekin kuni kecha dunyoda yana bir mojarolar o‘chog‘i avj olgani nafaqat Yaqin Sharq, balki mintaqamizga ham o‘z ta’sirini ko‘rsatmay qolmaydi”, dedi davlat rahbari.
Shavkat Mirziyoyevning qayd etishicha, keskinlashuv davom etsa, pandemiyadan keyin endi-endi tiklanayotgan savdo aloqalari va logistika marshrutlari qiyinlashadi.
“Shu bois har bir hokim hududidagi, vazirlar esa tarmog‘idagi imkoniyat va xavflarni oldindan ko‘ra bilib, proaktiv, ya’ni topshiriq kutmasdan, o‘zi tashabbus ko‘rsatib ishlashga o‘tishi shart”, dedi davlat rahbari.
Uning ta’kidlashicha, eng muhimi, aholi va biznes bilan muloqotni yanada kuchaytirib, ular so‘rayotgan masalalarni tez-tez hal qilib berish bu rahbarlarning asosiy vazifasi bo‘lishi zarur.
13-iyundan Eron-Isroil mojarosi yana avj olgandi. Isroil Eron yadro quroli yaratishga yaqinlashgani sababli yadroviy, harbiy obyektlar va yuqori martabali harbiylar joylashgan manzillarga hujum qildi. Eron ham Isroilga qarshi zarbalar berdi. Ikki mamlakatda ham tinch aholi orasida qurbonlar soni ortib bormoqda.
Izoh (0)