Ukraina prezidenti Vladimir Zelenskiy jurnalistlar bilan uchrashuvda “Flamingo” nomli 3 ming kilometr masofaga uchuvchi raketa muvaffaqiyatli sinovdan o‘tkazilganini aytdi. Bu haqda DW nashri xabar berdi.
“Sinovlar muvaffaqiyatli o‘tdi. Hozircha bizda mavjud raketalar ichida eng muvaffaqiyatlisi shu — u uch ming kilometr masofaga uchadi”, degan Ukraina rahbari.
Ukraina prezidentining so‘zlariga ko‘ra, hozircha bunday turdagi raketalardan yuzlab marta foydalanib bo‘lmaydi. Shu sababli batafsil tafsilotlar oshkor qilinmaydi.
Zelenskiyning ta’kidlashicha, “2026-yil dekabr oxirigacha yoki yanvar–fevral oylarida” ushbu raketalarni ommaviy ishlab chiqarish yo‘lga qo‘yilishi kerak.
“Sinovdagi muvaffaqiyatni hisobga olish kerak. Shuningdek, dastur moliyalashtirilishini ham inobatga olish zarur”, degan Ukraina yetakchisi.
“Flamingo” raketasining suratini ukrainalik fotomuxbir Yefrem Lukatskiy Facebook sahifasida joylashtirgan. U AQSHning Associated Press agentligida ishlaydi. Uning ma’lumotiga ko‘ra, raketa Fire Point kompaniyasi tomonidan ishlab chiqarilmoqda. Gap yer usti bazasidan uchiriladigan raketa haqida ketmoqda.
20-avgust kuni Kiyevda bo‘lib o‘tgan brifingda Zelenskiy Rossiya Ukraina Sumi viloyatini qo‘lga kiritolmasligini va RF qo‘shinlari joylashgan chegaradosh hududlarni ushlab turolmasligini bildirgan.
Shuningdek, Ukraina davlat rahbari Rossiya prezidenti Vladimir Putin bilan tinchlik kelishuvi yuzasidan sammit o‘tkazishga roziligini ma’lum qildi. Zelenskiyning aytishicha, uchrashuv Avstriya, Shveysariya yoki Turkiya hududida bo‘lishi mumkin. Uchrashuv aniq Vengriya yoki Rossiyada o‘tkazilmaydi.
Izoh (0)