Joriy yilning o‘tgan davrida Vaqf fondi tomonidan O‘zbekistondagi muhtoj oilalarga 43 ta uy qurib berilgan. Bu haqda 21-avgust kuni Musulmonlar idorasi matbuot xizmati xabar berdi.
-KTGJOMEr.avif)
Manbaga ko‘ra, fond faoliyatiga oid yig‘ilishida Vaqf tomonidan kam taʼminlanganlarni qo‘llab-quvvatlash bo‘yicha salmoqli ishlar qilingani aytilgan.
“Vaqf fondi tomonidan amalga oshirilgan xayriya ishlari o‘tgan yilning shu davriga nisbatan sezilarli oshgani qayd etilib, uyga muhtoj 43 ta oilaga homiylar ko‘magida to‘liq jihozlangan uy qurib berilgan. Jarrohlik amaliyoti, davolanish va nogironligi bo‘lgan 1200 nafar fuqaroga sog‘liqlarini tiklash uchun moddiy yordam ko‘rsatilgani ijobiy natija sifatida baholandi”, deyiladi xabarda.
Shu bilan birga, manba fond tomonidan yordamga muhtoj oilalar farzandlariga o‘quv qurollari tarqatilgani, chekka hududlarda quduq qazib, suv chiqarish ishlari bajarilganini ham qayd etgan. O‘z navbatida o‘quv markazlari, tibbiyot muassasalari va xorijiy hamkorlar bilan yaxshi aloqa yo‘lga qo‘yilganiga ham to‘xtalgan.
Yig‘ilishda oldinda turgan muhim vazifa Vaqf mulklarini shakllantirish va yangilarini xarid qilish ekani keltirilgan. Fond markaziy apparati va hududiy filiallar shtat jadvallarini qayta shakllantirish, xalqaro aloqalarni rivojlantirish zarurligi ham bildirilgan.
Fond rasmiy saytida kunlik xayriya mablag‘lari tushumlari miqdori ko‘rsatib boriladi. “Daryo” hisob-kitoblariga ko‘ra, joriy yil boshidan 21-avgustgacha fondga 23,2 milliard so‘m xayriya qilingan.
Izoh (0)