Yaponiyaning Okinava orolidagi AQSHning “Kadena” harbiy-havo kuchlari bazasida portlash sodir bo‘ldi. Bu haqda NHK telekanali ma’lum qilmoqda.
Hodisa Amerika bazasi hududida Yaponiya mudofaa kuchlari boshqarayotgan obyektda yuz bergan. Taxminlarga ko‘ra, hodisa portlamay qolgan snaryadlarni vaqtincha saqlash joyida sodir bo‘lgan. Portlash oqibatida kamida to‘rt kishi jarohat olgan.
Ta’kidlanishicha, ushbu hodisa yong‘in tarqalishi xavfini keltirib chiqarmaydi. Dastlabki ma’lumotlarga ko‘ra, Yaponiya mudofaa kuchlari xodimlari portlamay qolgan o‘q-dorilarni yo‘q qilishga tayyorgarlik ko‘rayotganda portlash yuz bergan.
Aniqlanishicha, jabrlanuvchilarning qo‘llari kesilgan va quloqlari og‘ir shikastlangan.
Mudofaa vazirligi ma’lumotlariga ko‘ra, bu 1974-yilda Quruqlikdagi o‘zini o‘zi mudofaa kuchlarida portlamagan o‘q-dorilarni zararsizlantirishga ixtisoslashgan bo‘linma tashkil etilganidan buyon ishlar davomida portlamagan o‘q-dorining portlashi bilan bog‘liq birinchi hodisa hisoblanadi. Shuningdek, bu portlash jarohatlanishlarga olib kelgan ilk holat ham bo‘ldi.
“Men yonimdan o‘tib ketayotgan politsiya mashinasini, tanish belgilari bo‘lmagan politsiya mashinasini va tez yordam mashinasini ko‘rdim-da, dastlab buni yo‘l-transport hodisasi deb o‘yladim. Bu portlamagan bomba ekanligini anglamadim, shuning uchun hozir hayratdaman. Men bu yerda 69 yildan beri yashab kelaman, ammo portlamagan bomba portlashi haqida birinchi marta eshitishim. Jarohatlar jiddiy bo‘lmaganidan xursandman”, deydi portlash joyidan taxminan 1,5 kilometr janubi-sharqda ishlayotgan ayol.
Izoh (0)