25 yoshli eng mashhur tiktoker Habi Leymni AQSH migratsiya xizmati hibsga olib, mamlakatdan chiqarib yubordi. Bu haqda France24 xabar berdi.
Leym — asli senegallik bloger bo‘lib, uning TikTokʼda 162 milliondan ortiq obunachisi bor, dunyodagi eng mashhur tiktokerlardan biri hisoblanadi. Undan keyin Charli DʼAmelio (151 milliondan ortiq obunachi) va Bella Porch (93 milliondan ortiq) turadi.
Leym 6-iyun kuni Las Vegasdagi Garri Rid xalqaro aeroportida qo‘lga olingan. “Leym 30-aprel kuni Qo‘shma Shtatlarga kirib keldi va viza shartlarini buzdi. Leymga 6-iyun kuni ixtiyoriy ravishda ketish huquqi berildi va shundan so‘ng u AQSHni tark etdi”, deb maʼlum qildi idora.
Leym o‘zining hibsga olingani haqidagi xabarga izoh bermadi, biroq TikTok joylashda davom etdi. Tiktoker murakkab maslahatlarni so‘zsiz, oddiygina harakatlar bilan masxara qilgan videolari orqali mashhur bo‘lgan.
5-iyun kuni migratsiya xizmati vakillari migrantlarni hibsga olishning rekord soni haqida xabar berdi, ular bir kunda 2200 kishini qo‘lga olishdi.
Migrantlarning ommaviy hibsga olinishi oxir-oqibat norozilik namoyishlari va politsiya bilan to‘qnashuvlarga olib keldi. AQSH armiyasi noroziliklarga javoban Los Anjelesdagi uchta turli joyga, yuzlab odamlar norozilik bildirgan hududlarga, 300 ga yaqin harbiyni joylashtirdi.
Inauguratsiya kuni, 20-yanvarda, AQSH prezidenti Donald Tramp prezidentlik lavozimidagi ilk nutqida noqonuniy muhojirlarni mamlakatdan chiqarib yuborish jarayonini zudlik bilan boshlashga vaʼda bergandi.
Izoh (0)