What’s on Netflix nashrining xabar berishicha, Janubiy Koreyaga tegishli “Kalmar o‘yini” serialining amerikacha versiyasi 2027-yil dekabr oyida Los Anjelesda suratga olinadi.
Mazkur loyiha bir necha yildan beri ishlab chiqilayotgan bo‘lsa-da, Netflix hanuzgacha bu haqda rasmiy bayonot bermagan va hatto uning mavjudligini tasdiqlamagan.
Loyiha tafsilotlari hozircha juda kam. Dastlabki ma’lumotlarga ko‘ra, yangi serial asl voqealarning remeyki emas, balki davomi bo‘ladi. Ssenariy ustida “Utopiya” seriali bilan tanilgan Dennis Kelli ishlamoqda.
Joriy yil iyun boshida taniqli insayder DanielRPK yangi serial nomi o‘zgarishi va “Kalmar o‘yini” nomidan voz kechilishi mumkinligi haqida xabar bergan edi. Shunga qaramay, ko‘plab manbalar hozircha loyihaning ishchi nomi sifatida “Kalmar o‘yini: Amerika” deb yuritilayotganini bildirgan.
Serial rejissyori sifatida “Oskar” mukofoti sovrindori Devid Fincher tasdiqlangan. U Netflix bilan ko‘p yillik hamkorlik shartnomasiga ega. Loyiha prodyuserlari Zeus Zamani va Rett Jillz bo‘ladi.
Avvalroq original serial muallifi Xvan Don Xyok “Kalmar o‘yini” loyihasining spin-offi bo‘yicha yangi g‘oyasi borligini ma’lum qilgan edi. Unga ko‘ra, spin-off versiyada serial qahramonlarining birinchi va ikkinchi mavsum voqealari oralig‘idagi hayoti haqida hikoya qilinadi.
Izoh (0)