Polshaning PGZ davlat mudofaa konserni artilleriya snaryadlari ishlab chiqarishni besh baravarga ko‘paytirib, 150-180 ming donaga yetkazmoqchi. Bu haqda mamlakat davlat aktivlari vaziri Yakub Yavorovskiy Financial Times nashriga bergan intervyusida ma’lum qildi.
Uning aytishicha, Polsha import qurollariga qaramlikni kamaytirish va sharqdan kelayotgan Rossiya tahdididan o‘zini himoya qilish maqsadida gaubitsa snaryadlari ishlab chiqarishni besh baravarga oshiradi.
“Qisqa muddatli maqsadimiz — bu turdagi qurollar ishlab chiqarishni sezilarli darajada ko‘paytirish, xorijiy yetkazib beruvchilardan mustaqil bo‘lish va milliy avtonomiya uchun mustahkam asos yaratishdir”, dedi Yavorovskiy.
Yavorovskiyning so‘zlariga ko‘ra, PGZ yaqin kunlarda Polsha mudofaasi uchun jiddiy muammolardan biri bo‘lgan snaryadlar ishlab chiqarishni ko‘paytirish uchun 663 million dollar mablag‘ oladi. Qo‘shimcha mablag‘lar kiritilishi 155 mm kalibrli snaryadlar va 120 mm kalibrli tank o‘qlari ishlab chiqarish hajmini oshirish imkonini beradi.
PGZ hozirda yiliga 30 mingta yirik kalibrli snaryad ishlab chiqaradi va uch yil ichida bu ko‘rsatkichni 150-180 mingtaga yetkazishni rejalashtirmoqda.
Nashrning ta’kidlashicha, Polsha NATO davlatlari orasida mudofaaga eng ko‘p mablag‘ sarflaydi: 2025-yilda ushbu harbiy ehtiyojlarga yalpi ichki mahsulotning 4,7 foizi yo‘naltirilishi kutilmoqda. Biroq mablag‘larning aksariyati hozirgacha xorijiy yetkazib beruvchilarga, asosan AQSH va Janubiy Koreyaga yo‘naltirilgan edi. Endi Polsha hukumati kuchlarni milliy ishlab chiqaruvchilarni qo‘llab-quvvatlashga qaratmoqda.
Ta’kidlanishicha, bu harakat Yevropaning mudofaa sohasida AQSH va boshqa xorijiy yetkazib beruvchilarga qaramligini kamaytirish siyosati doirasida amalga oshirilmoqda.
Izoh (0)