Ayrim ijtimoiy tarmoqlarda Ukrainadan evakuatsiya qilinayotgan O‘zbekiston fuqarolarini mamlakatga olib kelish uchun tashkil etilayotgan maxsus aviareyslar uchun chiptalar sotilayotgani to‘g‘risida ma’lumotlar tarqalmoqda. O‘zbekiston Transport vazirligi mazkur holatga munosabat bildirdi.
Ma’lum qilinishicha, maxsus aviareyslar O‘zbekiston hukumati tomonidan bepul tashkil etilmoqda.
Hozirda Polshaning Katovitse shahridan Uzbekistan Airways tomonidan bajarilayotgan maxsus aviaqatnovlar orqali O‘zbekistonga olib kelinayotgan fuqarolardan aviachipta uchun hech qanday to‘lov undirilmaydi.
Ukrainadagi O‘zbekiston fuqarolarini evakuatsiya qilish hamda maxsus aviareyslar orqali mamlakatga jo‘natish ishlari Tashqi ishlar vazirligi tomonidan muvofiqlashtirilmoqda.
Ukrainadan Polshaga evakuatsiya qilingan O‘zbekiston fuqarolarini olib uchgan Uzbekistan Airways aviakompaniyasi samolyoti 28-fevral soat 22:49 da “Toshkent” xalqaro aeroportiga kelib qo‘ndi.
Ushbu maxsus reys bilan 251 nafar O‘zbekiston fuqarosi Polshaning Katovitse shahridan olib kelingan. Olib kelinganlarning 37 nafari bolalar va 10 nafari — chaqaloq.
1-mart kuni soat 09:15 da Ukrainadan Polshaga evakuatsiya qilingan O‘zbekiston fuqarolarini olib uchgan Uzbekistan Airways aviakompaniyasining navbatdagi samolyoti “Toshkent” xalqaro aeroportiga yetib kelgan.
Eslatib o‘tamiz, Ukrainadan evakuatsiya qilinayotgan o‘zbekistonliklarning dastlabki guruhi 28-fevral kuni, ikki guruhi esa 1-mart kuni Toshkentga yetib keldi. O‘zbekistonning Polshadagi elchisi Bahrom Boboyevning so‘zlariga ko‘ra, Ukraina hududida bo‘lgan 1,5 ming nafardan ziyod O‘zbekiston fuqarosi Polsha orqali evakuatsiya qilinishi rejalashtirilgan.
Izoh (0)