Polsha huquq-tartibot organlari Markaziy korrupsiyaga qarshi kurash byurosining ikki nafar sobiq xodimi 578 nafar polshalik muxolif siyosatchining telefonlarini tinglash uchun Isroilning “Pegasus” josuslik dasturidan foydalanganlikda ayblanib hibsga oldi. Bu haqda “Radio Zet” radiostansiyasi xabar bermoqda.
“Pegasus ishi bo‘yicha tergov guruhi prokurorining farmoyishiga ko‘ra, bugun MKKBning ikki nafar sobiq xodimi hibsga olindi”, deya Polsha milliy prokuraturasi vakili Pshemislav Novakning so‘zlarini keltiradi radiostansiya.
Uning ma’lum qilishicha, gap byuroning Varshavadagi bo‘limi rahbari va tezkor-tergov bo‘limi boshlig‘i haqida ketmoqda. Ularning ismi va familiyasi oshkor qilinmagan. Hibsga olinganlarning dastlabki so‘rog‘i payshanba kuni o‘tkaziladi.
“Pegasus” dasturi dastlab MKKBning tashabbusi bilan Isroildan xarid qilingan, ammo keyinchalik undan olingan ma’lumotlardan boshqa maxsus xizmatlar — Ichki xavfsizlik agentligi va Harbiy kontrrazvedka xizmati, shuningdek, politsiya ham foydalana boshlagan. Bunda IXA va HKX “Pegasus” yordamida olingan ma’lumotlardan foydalanganlik uchun korrupsiyaga qarshi kurashish byurosiga haq to‘lagan. Harbiy kontrrazvedka buning uchun MKKB hisobiga yiliga 4 million zlotiy (taxminan 1 million dollar) o‘tkazib kelgan.
Josuslik dasturining xarid qilinishi Polshada o‘ng-konservativ “Huquq va adolat” partiyasi hukmronligi davrida (2015—2023-yillar) amalga oshirilgan.
Polsha ommaviy axborot vositalari ma’lumotlariga ko‘ra, u hukmron partiyaning siyosiy raqiblarini kuzatish uchun ishlatilgan. 2024-yil aprelida “Pegasus” dasturidan noqonuniy foydalanish bo‘yicha boshlangan tergov haligacha yakunlanmagan.
Izoh (0)