Dastlabki ma’lumotlar Polshaga raketalar Rossiyadan uchirilganini rad etmoqda. Bu haqda AQSH prezidenti Jo Bayden Balida dunyo yetakchilari bilan uchrashuv yakunida aytib o‘tdi.
“Dastlabki ma’lumotlarga ko‘ra, bu inkor etilmoqda. Men bu haqda tekshiruv to‘liq yakunlanmagunicha gapirishni istamayman, lekin trayektoriya nuqtai nazaridan, bu Rossiyadan uchirilgani ehtimoldan uzoq. Lekin ko‘ramiz”, — dedi u.
Amerika yetakchisi Balida G7 va NATO yetakchilari bilan uchrashgani, ular Polshaning Ukraina bilan chegara yaqinidagi qishlog‘ida yuz bergan portlash yuzasidan tekshiruv o‘tkazishda Polshani qo‘llab-quvvatlashga kelishib olganini ham aytdi.
“Shundan keyin biz navbatdagi qadamimizni birgalikda aniqlashtirib olamiz. Biz, to‘planganlar, bir yoqadan bosh chiqardik”, — deya qo‘shib qo‘ydi Bayden.
Polshaga raketalar kelib tushganidan keyin ko‘p o‘tmay, Polsha prezidenti Anjey Duda Bayden bilan shoshilinch muzokaralar o‘tkazgan. Oq uy xabariga ko‘ra, ular Polshadagi portlashlar yuzasidan keyingi qadamlarni muvofiqlashtirish haqida kelishib olgan.
“Prezident Bayden Polshada tekshiruvlar olib borish uchun AQSHning to‘liq yordamini taklif qildi. Bayden Qo‘shma Shtatlarning NATOga qat’iy sodiqligini tasdiqladi”, — deyiladi xabarda.
Polshaga raketalar kelib tushdi
15-noyabr kuni Ukraina hududi yoppasiga hujumga uchradi, energetika infratuzilmasi obyektlari uning nishoniga aylandi. Hukumat portlashlar va elektr energiyasidagi uzilishlar haqida ma’lum qildi.
Shundan keyin Polshaning Radio Zet radiosi Ukraina bilan chegaradan 8 km uzoqlikda, Lyublinsk viloyatidagi Pshevodov qishlog‘ida joylashgan don quritish inshootida portlash yuz berib, oqibatda ikki kishi halok bo‘lganini ma’lum qildi. Yong‘in xizmati hodisa sababi hozircha noma’lumligini qayd etdi.
Polshada milliy xavfsizlik qo‘mitasi favqulodda yig‘ilish o‘tkazdi, shundan keyin Varshava ba’zi harbiy qismlarda jangovar shaylikni oshirdi. Polsha prezidenti Anjey Duda 16-noyabrga Milliy xavfsizlik kengashi yig‘ilishini ham belgilagan.
Reuters yozishicha, shu kuniyoq Polsha iltimosi bilan NATO elchilari favqulodda uchrashuv o‘tkazadi, u alyans ustavining tomonlardan birining hududiy yaxlitligi, siyosiy mustaqilligi yoki xavfsizligi tahdid ostida qolgan taqdirda, maslahatlashuvlar olib borish haqidagi 4-moddasi asosida tashkil etiladi. Shuningdek, 16-noyabrga BMT Xavfsizlik kengashining Ukrainadagi vaziyat bo‘yicha majlisi ham belgilangan.
Rossiya portlashga aloqadorligini rad etmoqda
Bir qator mamlakatlar hodisada Rossiyani aybladi. Rossiya Mudofaa vazirligi portlashga aloqadorligini rad etdi va Polsha-Ukraina chegarasiga yaqin obyektlarga zarbalar berilmaganini ma’lum qildi. Mudofaa idorasi bunday xabarlarni “keskinlikni kuchaytirishga qaratilgan provokatsiya” deb atadi. Pentagon Polshaga kelib tushgan raketalar Rossiyaniki bo‘lganini hozircha tasdiqlay olmasligini bildirdi. OAVlarga ko‘ra, voqea joyidan topilgan raketa bo‘laklarida yozuvlar yo‘q.Duda Varshavada raketalarning kelib chiqishi haqida aniq ma’lumotlar yo‘qligini aytdi. “Kun bo‘yi Rossiyaning Ukrainaga qarshi raketa hujumi davom etganini aniq bilamiz, biroq ayni paytda bizda bu raketani kim uchirgani yuzasidan aniq dalillar yo‘q”, — dedi u.
Bu orada Polsha Tashqi ishlar vazirligi Rossiya elchisi Sergey Andreyevni chaqirtirdi va undan Ukraina o‘qqa tutilganidan keyin Polshaning chegaraga yaqin qishlog‘iga “Rossiyada ishlab chiqarilgan snaryad kelib tushgani” yuzasidan “zudlik bilan batafsil tushuntirishlar” berishni talab qildi.
Izoh (1)
Бир суткадами