Britaniya qiroli Karl III Xitoyda ishlab chiqarilgan Lotus Eletre elektromobilini sotib oldi. Uning narxi 210 ming dollarni tashkil etadi.
Odatda Britaniya qirollik oilasi o‘z davlatida ishlab chiqarilgan avtomobillarni afzal ko‘radi. Masalan, yoshligida Karl onasi Yelizaveta II tomonidan sovg‘a qilingan Aston Martin DB6 rusumli mashinani haydagan. Shuningdek, qirollik garajida Rolls Royce, Land Rover va Bentley avtomobillari mavjud.
So‘nggi vaqtlarda Britaniya avtomobil sanoatining ahvoli unchalik yaxshi emas, bu hatto qirollik oilasiga ham ta’sir qilgan. The Sun nashrining yozishicha, saroy vakillaridan biri shunday degan:
“Agar Bentley qirollik oilasida foydalaniladigan limuzinlarni elektromotor bilan ishlab chiqarishga qodir bo‘lmasa, ular boshqa brendlarni ham ko‘rib chiqishga tayyor”.
Foto: The Daily Beast
Karl III xarid qilgan Lotus Eletre ana shunday parametrlarga mos bo‘lib chiqdi. Bir tomondan, Lotus kompaniyasining kelib chiqishi britan ildizlari bilan bog‘liq: Lotus 1952-yilda Buyuk Britaniyada asos solingan va 70 yildan ortiq sport avtomobillarini ishlab chiqargan. Biroq 2017-yilda kompaniya aksiyalarining 51 foizi Xitoyning yirik avtomobil konserni Geely Automobile’ga o‘tgan. 2021-yildan boshlab ishlab chiqarish Xitoyning Uxan shahriga ko‘chirilgan.
Qirol xarid qilgan avtomobil to‘q qizil rangga bo‘yalgan, bu rang Britaniya monarxiyasining ramziy belgisi hisoblanadi. Qirol ushbu elektromobilda chekka hududdagi dalahovlisiga borishni rejalashtirmoqda.
Izoh (0)