Bukingem saroyi malika Keyt Middlton vafot etgan taqdirda amalga oshiriladigan “Reding ko‘prigi operatsiyasi” nomli maxfiy reja tayyorlagan. Bu haqda belgiyalik jurnalist va Britaniya qirollik oilasi bo‘yicha solnomachi Bertran Dekkers o‘z kitobida ma’lum qilgan, deya Le Figaro nashri xabar berdi.
Dekkersning yozishicha, shu kungacha bu kabi reja haqida rasmiy ma’lumot bo‘lmagan, u o‘ta maxfiy tarzda saqlangan. Bukingem saroyi malika vafoti ehtimoliga doir jamoatchilikdan puxta yashirilgan protokol tuzgan.
Reja nomini Keytning turmush o‘rtog‘i shahzoda Uilyam tanlagan. Bu tanlov bejiz emasligi ta’kidlanmoqda. Jumladan, Reding — Buyuk Britaniyaning Berkshir grafligidagi shahar bo‘lib, aynan shu yerda Keyt 1982-yil 9-yanvarda tug‘ilgan.
Shuningdek, rejaning qisqartmasi — O.R.B. (Operation Reading Bridge) — ramziy ma’noga ega. Orb — qirol yoki qirolicha toj kiyganda chap qo‘lida tutadigan, ustida xoch bo‘lgan qirollik nishoni bo‘lib, Xudoning yer ustidagi hokimiyatini ifodalaydi.
Dekkers bu ma’lumotni o‘zining “Jeyms Bondga o‘xshagan” manbalaridan biri orqali olganini ta’kidlaydi. Uning fikricha, operatsiya nomi deyarli shahzoda Uilyamdan Keytga bildirilgan sevgi izhori sifatida talqin qilinishi mumkin.
Malikaning sog‘lig‘i haqida
2024-yil boshida malika Keyt Middlton qorin bo‘shlig‘ida jarrohlik amaliyotini o‘tkazgan. Shundan so‘ng shifokorlar unda saraton kasalligini aniqlagan. U kasalxonada uch hafta davomida davolangan.
2024-yil mart oyida rasmiy bayonot orqali Keyt kimyoterapiya kursini boshlagani e’lon qilingan. Yanvar oyida 43 yoshga to‘lgan Middlton, 14-mart kuni remissiyaga erishganini bildirgan va asta-sekin qirollikdagi vazifalariga qaytishni boshlagan.
Izoh (0)