O‘zbekistonning yangi tayinlangan elchisi Norvegiya qiroliga ishonch yorliqlarini topshirdi, deb xabar bermoqda “Dunyo” AA.
Maʼlum qilinishicha, O‘zbekistonning Norvegiyaga yangi tayinlangan elchisi (qarorgohi Stokgolm shahrida joylashgan) Rahmatulla Nurimbetov 15-may kuni ushbu mamlakat Qiroli Xarald V ga ishonch yorliqlarini topshirdi.
Marosimdan so‘ng bo‘lib o‘tgan muloqot chog‘ida siyosiy, savdo-iqtisodiy, sarmoyaviy, texnologik va madaniy-gumanitar sohalarda O‘zbekiston–Norvegiya munosabatlarining holati va uni rivojlantirish istiqbollari muhokama qilindi.
Shu bilan birga, iqlim o‘zgarishi oqibatlariga qarshi kurashish, “yashil” energiyani rivojlantirish, qashshoqlikni kamaytirish, ayollar va yoshlarning jamiyatdagi rolini oshirish kabi muhim yo‘nalishlarda ikki tomonlama hamkorlikni kengaytirish uchun salmoqli salohiyat mavjudligi taʼkidlandi.
Maʼlumot uchun, O‘zbekiston va Norvegiya o‘rasidagi diplomatik munosabatlar 1992-yil 10-iyunda o‘rnatilgan. Rahmatulla Nurimbetov 2024-yil 15-oktyabr kuni O‘zbekistonning Shvetsiyadagi elchisi sifatida Stokgolm shahriga bordi va 4-dekabr kuni Qirol Karl XVI Gustavga ishonch yorliqlarini topshirdi.
2025-yil 31-yanvarda Baxtiyor Ibragimov O‘zbekistonning Albaniyadagi birinchi elchisi etib tayinlangani haqida xabar berilgan edi. Ravshan Usmonov esa O‘zbekistonning Islandiyadagi (qarorgohi London shahrida joylashgan) elchisi etib tayinlandi va 7-fevral kuni Islandiya prezidenti Xalla Tomasdottirga ishonch yorliqlarini topshirdi. 11-fevral kuni O‘zbekiston elchisi Temur Rahmonov Litva prezidenti Gitanas Nausedaga ishonch yorliqlarini topshirdi.
Izoh (0)