Angliyaliyalik lordga turmushga chiqqan samarqandlik Guli Xonim Shayx (Guli Murodova) Buyuk Britaniyaning eng qadimiy va nufuzli unvonlaridan biri — Freedom of the City of London (London shahri erkin fuqarosi) unvoni bilan taqdirlandi. Bu haqda Guli Xonim Shayx “Daryo” muxbiri bilan suhbatda ma’lum qildi.
Bu unvon kimlarga beriladi?
Bugungi kunda ushbu unvonga sazovor bo‘lganlar orasida:
• Qirol Charlz III
• Mashhur hamshira Florens Naytingeyl
• Sobiq bosh vazir Margaret Tetcher
• Inson huquqlari himoyachisi Nelson Mandela
• Malika Diana
• Siyosatchi Uinston Cherchill
• Texnologiya yetakchisi Bill Geyts kabi dunyoga mashhur shaxslar bor.
Guli Xonim Shayx ushbu nufuzli unvonni olgan birinchi o‘zbek ayoli hisoblanadi.
Mazkur unvon qadim zamonlardan beri shaharga alohida xizmat ko‘rsatgan, ijtimoiy, madaniy va xalqaro miqyosda muhim hissa qo‘shgan shaxslarga topshiriladi. Guli Xonim Shayxning ijtimoiy faolligi, xalqaro tashabbuslari va ayollar salohiyatini targ‘ib etish borasidagi saʼy-harakatlari ushbu yuksak eʼtiborga sazovor bo‘ldi.
“Bu faqat men uchun emas, balki butun o‘zbek ayollari uchun katta sharaf. Bu yutuq orqali yurtimiz nomini yanada yuksaltirishga hissa qo‘shishni davom ettiraman”, deydi Guli Xonim Shayx.
Guli Xonim Shayx 2015-yilda multimillioner va lord, Konservativ musulmon forumi asoschisi, baron va Buyuk Britaniya Lordlar palatasining umrbod a’zosi bo‘lgan Lord Muhammad Iltaf Shayxga turmushga chiqqan edi. Lord Muhammad Iltaf Shayx 2022-yilda vafot etdi.
Izoh (0)