Saudiya Arabistoniga 2025-yilgi haj mavsumi uchun xorijdan bir milliondan ortiq ziyoratchi keldi. Bu haqda haj va umra ishlari vaziri Tavfiq Al-Rabia ma’lum qildi.
Ma’lum qilinishicha, hajga kelganlarning 53 foizi erkaklar, qolgan 47 foizi esa ayollardir. Ziyoratchilarning 94 foizi havo yo‘li bilan, 4,83 foizi quruqlikdagi chegara punktlari orqali, taxminan, 0,5 foizi esa dengiz orqali yetib kelgan. Shuningdek, 249 400 nafar ziyoratchi “Makka yo‘li” tashabbusi doirasida Saudiya Arabistoniga tashrif buyurgan.
Vazir haj va umra mavsumiga tayyorgarlik 2024-yilgi haj amallari yakunida boshlanganini aytdi.
Tayyorgarlik jarayonlari doirasida turli mamlakatlarga dastlabki tashkiliy hujjatlar yuborildi. 2025-yil yanvar oyida ikki muqaddas masjid posboni qirol Salmon homiyligida eng yirik Haj konferensiyasi va ko‘rgazmasi o‘tkazildi. Unda dunyoning 87 mamlakatidan vakillar ishtirok etdi, dedi Al-Rabia.
U qonuniy ziyoratchilarning xavfsizligini ta’minlashga qaratilgan “Ruxsatnomasiz hajga bormang” tashabbusining muhimligini ta’kidladi. U soxta haj kampaniyalariga qarshi kurashda turli mamlakatlarning rolini yuqori baholadi.
Hajga ruxsatnomasiz borganlar 5 ming dollardan ortiq jarimaga tortiladi va 10 yilga Saudiya Arabistoniga kirishi taqiqlanadi. Saudiya Arabistoni haj ziyorati vaqtida Makkaga borishga yangi cheklovlar kiritgandi. Vizasi tugaganlarga boshpana bergan yoki ularni hajga olib borgan shaxslarga ham jarima qo‘llanadi. Makka va Madina shahriga faqat haj uchun maxsus viza asosida kirishga ruxsat beriladi.
Izoh (0)