Namangan viloyati Chust tumanida harakatlanayotgan mashina tomiga o‘tirib, video olgan ayolga chora ko‘rildi. Bu haqda viloyat YHXB xabar berdi.
Maʼlum qilinishicha, Chust tumanida harakatlanib ketayotgan Gentra tom qismiga o‘tirib olgan va o‘zini tasvirga olib ketayotgan ayol videosi ko‘plab eʼtirozlarga sabab bo‘lgan.
Holat yuzasidan yo‘l harakati xavfsizligi xodimlari tomonidan tezkor choralar ko‘rilib, avtomashina aniqlandi va belgilangan tartibda jarima maydonchasiga olib kelindi. Haydovchi 1 yil 6 oy muddatga transport vositasini boshqarish huquqidan mahrum qilindi va unga BHMning 25 barobari (9 mln 375 ming so‘m) jarima tayinlandi.
Avtomashinaning tom qismida harakatlangan ayolga esa 1,5 yoshli farzandi borligi inobatga olinib, BHMning 5 barobari (1 mln 875 ming so‘m) jarima jazosi tayinlandi.
“Avtomobil lyukidan chiqib, o‘zimga Instagramʼga kontent olish uchun harakatlandim. Hozir militsiyaxonada turibmiz. Kerakli choralarni qo‘llashyapti. Chust tumanidagi barcha haydovchilardan, xalqimizdan kechirim so‘rayman, boshqa qaytarilmaydi”, deydi ayol.
Mashinalardagi “tomoshalar”
Bundan oldin Qoraqalpog‘istondagi to‘yda tanasini mashinadan chiqarib tasvirga olgan operatorlar va haydovchi jarimaga tortilgan edi. Shuningdek, Andijonda 20 yoshli qiz mashinadan tanasini chiqarib harakatlangan.
Samarqandda harakatlanayotgan Gentra’dan tanasini chiqarib, soxta dollar sochgan yigitlarga chora ko‘rilgani to‘g‘risida xabar berilgandi. Shu bilan birga, Farg‘onada to‘yda tomosha ko‘rsatgan haydovchilar jazolangandi.
Andijonda qiz tunda tanishining mashinasidan tanasini chiqarib harakatlangandi.
Namanganda Onix lyukidan tanasini chiqarib harakatlangan qiz uzr so‘ragan.
Izoh (0)