Abdusalom Azizov va Po‘lat Bobojonov yangi lavozimlarga tayinlandi

O‘zbekiston prezidenti farmoni bilan qator tayinlovlar amalga oshirildi. Bu haqda prezident matbuot kotibi Sherzod Asadov xabar berdi.

 

Farmon asosida Po‘lat Bobojonov prezidentning kadrlar bo‘yicha maslahatchisi o‘rinbosari lavozimiga tayinlandi. Shu munosabat bilan prezidentning kadrlar siyosati masalalari bo‘yicha maslahatchisi birinchi o‘rinbosari vazifasidan olindi. Bundan avval Po‘lat Bobojonov ichki ishlar vaziri sifatida faoliyat yuritgan.

Farmon bilan Galina Saidova prezidentning iqtisodiy siyosat bo‘yicha maslahatchisi o‘rinbosari etib tayinlandi. U bungacha prezidentning iqtisodiyot sohalarini rivojlantirish, investitsiya va tashqi savdo siyosatini amalga oshirish masalalari bo‘yicha maslahatchisi o‘rinbosari bo‘lgan.

Obid Hakimov prezidentining iqtisodiy siyosat bo‘yicha maslahatchisi o‘rinbosari – Iqtisodiy tadqiqotlar va islohotlar markazi direktori lavozimiga tayinlandi. Shu munosabat bilan prezidentning iqtisodiyot sohalarini rivojlantirish, investitsiya va tashqi savdo siyosatini amalga oshirish masalalari bo‘yicha maslahatchisi o‘rinbosari hamda Prezident administratsiyasi huzuridagi Iqtisodiy tadqiqotlar va islohotlar markazi direktori lavozimidan ozod etildi.

Farmonga binoan Abdusalom Azizov prezidentning vakillik organlari, nodavlat notijorat tashkilotlar, din va yoshlar masalalari bo‘yicha maslahatchisi o‘rinbosari lavozimiga tayinlandi. Shu munosabat bilan prezidentning ijtimoiy-siyosiy, diniy-maʼrifiy va yoshlar masalalari bo‘yicha maslahatchisi o‘rinbosari lavozimidan ozod etildi. Bundan avval Abdusalom Azizov davlat xavfsizlik xizmati raisi sifatida faoliyat yuritgan.

Farmon bilan Muzaffar Komilov prezidentning vakillik organlari, nodavlat notijorat tashkilotlar, din va yoshlar masalalari bo‘yicha maslahatchisi o‘rinbosari lavozimiga tayinlandi.

Rustam Komilov prezidentning vakillik organlari, nodavlat notijorat tashkilotlar, din va yoshlar masalalari bo‘yicha maslahatchisi o‘rinbosari lavozimiga tayinlandi. Shu munosabat bilan Prezident administratsiyasi axborot-kommunikatsiya texnologiyalari va jamoat loyihalari bo‘yicha sho‘ba mudiri lavozimidan ozod etildi.

Javlon Vahobov prezidentning tashqi siyosat bo‘yicha maslahatchisi o‘rinbosari – Markaziy Osiyo xalqaro instituti direktori lavozimiga tayinlandi.

Bahodir Toshmatov prezidenti huzuridagi Xavfsizlik kengashi kotibi o‘rinbosari lavozimiga tayinlandi. Shu munosabat bilan kengash kotibining Qurolli Kuchlarni rivojlantirish masalalari bo‘yicha o‘rinbosari lavozimidan ozod etildi.

Avvalroq ham Prezident administratsiyasida qator tayinlovlar amalga oshirilgandi (1,2,3).