Qoraqalpog‘istonning Nukus tumanida bo‘lib o‘tgan to‘yda avtomobil salonidan tanasini chiqargan holda to‘y kortejini tasvirga olgan operatorlar va avtomobil haydovchisi jarimaga tortildi. Bu haqda “Daryo”ga Qoraqalpog‘iston YHXB axborot xizmati rahbari Tursinbay O‘temuratov xabar berdi.
Ma’lum bo‘lishicha, voqea videosi ijtimoiy tarmoqlarda tarqalgach, mas’ullar holat haqida surishtirib, vaziyatga oydinlik kiritgan.
Boshqarma axborot xizmati rahbari Tursinbay O‘temuratovning “Daryo” muxbiriga ma’lum qilishicha, voqea shu yilning 18-iyun kuni Nukus tumanida yuz bergan.
Videoda aks etgan holat ishtirokchisi Nexia-3 haydovchisi va tasvirga oluvchi shaxslar javobgarlikka tortilgan. Mashinaning o‘zi esa Chimboy tumanidagi jarima maydonchasiga joylashtirilgan.
Yo‘l harakati xavfsizligi xizmatining ogohlantirishicha, transport vositasi harakatlanayotgan vaqtda yo‘lovchi tomonidan tana qismlarini (qo‘ldan tashqari) salondan chiqarish bazaviy hisoblash miqdorining bir baravari miqdorida jarima solishga sabab bo‘ladi.
Izoh (0)