O‘zbekistonda 2025-yilning hozirgi kuniga qadar samolyotda 5 ta o‘lim qayd etilgan. Bu haqda Uzbekistan Airports matbuot xizmati xabar berdi.
Ma’lum qilinishicha, 2024-yilda 14 ta o‘lim holati qayd etilgan bo‘lib, ulardan 11 tasi samolyot bortida, 3 tasi Toshkent xalqaro aeroportining uchib kelish zalida sodir bo‘lgan. 2025-yilning hozirgi kuniga qadar qayd etilgan 5 ta o‘lim holatining barchasi manzilga yetib borgunga qadar samolyot bortida ro‘y bergan.
2024-yilda O‘zbekiston aeroportlarida 46 nafar yo‘lovchi sog‘lig‘i sababli parvozga qo‘yilmagan. Joriy yilning olti oyida esa 61 yo‘lovchiga parvoz qilishga ruxsat berilmagan.
“Noxush holatlarning aksariyati parvoz vaqtida ro‘y beradi, shu bois yo‘lovchilar yuzaga kelishi mumkin bo‘lgan xavflarni oldindan bilishlari va havo qatnoviga qarshi ko‘rsatmalarni inobatga olishlari zarur”, dedi Uzbekistan Airports tibbiy xizmatni rivojlantirish bo‘limi boshlig‘i Sevara Salixova.
Ma’lum qilinishicha, fuqaroda o‘tkir yoki surunkali kasalliklar mavjud bo‘lsa, parvozlar salomatlik uchun potensial xavf tug‘dirishi mumkin. Bosimning o‘zgarishi, harakatning cheklangani va boshqa parvoz xususiyatlari yo‘lovchi holatini og‘irlashtirishi mumkin, shuning uchun ba’zi tibbiy ko‘rsatmalar bilan parvoz xavfli bo‘lishi va ayrim hollarda yo‘lovchi reysdan olinishi mumkin.
Uchishga qarshi asosiy tibbiy ko‘rsatmalar:
- yaqin orada o‘tkazilgan jarrohlik operatsiyalari;
- o‘tkir yurak-qon tomir kasalliklari (masalan, yurak xuruji, beqaror stenokardiya);
- insult va boshqa o‘tkir nevrologik holatlar;
- pnevmotoraks, og‘ir bronxial astma, pnevmoniya;
- tromboemboliya, faol qon ketish, og‘ir anemiya;
- quloq, burun bo‘shliqlari va ko‘zlarning barotravmasi;
- homiladorlikning so‘nggi bosqichlari, ayniqsa, og‘ir asoratlar bo‘lsa.
Uchish mumkin bo‘lmagan holatlarning to‘liq ro‘yxati bilan quyidagi havola orqali tanishish mumkin.
Qayd etilishicha, tibbiy qarshi ko‘rsatmalar bo‘yicha qo‘yiladigan talablar turli xil aviakompaniyalarda bir-biridan farq qilishi mumkin. Ba’zi hollarda aviatashuvchi shifokor ma’lumotnomasini talab qilish huquqiga ega. Masalan, beqaror tashxislar, kislorod bilan qo‘llab-quvvatlash zarurati, tibbiy nazorat yoki homiladorlikning so‘nggi bosqichlarida.
Shu sababli Uzbekistan Airports parvoz oldidan muayyan aviakompaniya qoidalarini o‘qishni, biror-bir kasallik bo‘lsa, shifokorga murojaat qilib, maslahatlashishni tavsiya etdi.
Izoh (0)