Buyuk Britaniyada Hindistonda yuz bergan Air India aviakompaniyasi samolyoti halokatida yaqinlarini yo‘qotgan ikki oila boshqa odamlarning jasadlarini olganini aytmoqda. Bu haqda India Today nashri xabar bermoqda.
Ma’lum qilinishicha, bir oila Londondagi sud-tibbiyot eksperti DNKni taqqoslab, tobutda ularning qarindoshi yo‘qligini aytgandan so‘ng, xatoni aniqlagan. Oqibatda dafn marosimini zudlik bilan bekor qilishga majbur bo‘lishgan.
Boshqa bir oilada vaziyat yanada dahshatliroq - tobutda bir vaqtning o‘zida ikki yo‘lovchining qoldiqlari borligi aniqlangan. Faqat takroriy ekspertizadan keyingina ularni bir-biridan ajratib, vidolashish marosimini o‘tkazilgan.
“Ayrim halokat qurbonlarining qoldiqlari aralashtirib yuborilgan va Buyuk Britaniyaga jo‘natilgan. Bir oilaga bir vaqtning o‘zida ikki kishining qoldiqlari solingan tobut berildi. Natijada dafn qilishdan oldin ularni aniqlash va ajratish kerak bo‘ldi.
Boshqa bir oila yanada og‘irroq vaziyatga tushib qoldi. Yuborilgan tobutda boshqa odam bo‘lgan, ularning yaqinlari esa haligacha topilmagan”, deydi advokat Jeyms Xili-Pratt.
Uning aytishicha, jasadlar shunchalik kuyganki, qarindoshlaridan DNK topshirish so‘ralgan. Shundan so‘ng Ahmadobod kasalxonasida jasadlar germetik tobutlarga joylashtirilgan va oila a’zolariga topshirilgan. Qayd etilishicha, Air India shaxsni aniqlashda ishtirok etmagan, faqat tashishni tashkil etishda ko‘maklashgan.
“Fojia sodir bo‘lganidan so‘ng, jabrlanganlarning shaxsini aniqlash belgilangan protokollar va texnik talablarga muvofiq amalga oshirildi. Barcha qoldiqlar yuqori professionallik va marhumlarga hurmat bilan topshirildi. Vaziyatni oydinlashtirish uchun Britaniya rasmiylari bilan hamkorlikni davom ettirmoqdamiz”, deya ma’lum qildi rasmiy tuzilmalar.
Buyuk britaniyaliklardan biri ota-onasi va kuyovidan ayrilgan. Uning aytishicha, ularga shunchaki yorliqli tobutlar berilgan va ichida kim borligini tekshirish imkoniyati berilmagan.
OAV ma’lumotlariga ko‘ra, halok bo‘lgan 12 kishining jasadi Buyuk Britaniyaga yuborilgan. Qolganlari oilaviy an’analarga ko‘ra Hindistonda dafn etilgan.
“Ba’zi qurbonlar zudlik bilan yoqib yuborildi yoki diniy an’analarga ko‘ra Hindistonda dafn qilindi. Ammo kamida 12 kishining qoldiqlari Buyuk Britaniyaga jo‘natildi”, deydi aviatsiya huquqshunosi Jeyms Xili-Pratt.
Hindistondan Buyuk Britaniyaga yo‘l olgan Boeing 787 Dreamliner yo‘lovchi samolyoti 12-iyun kuni Ahmadobod shahri yaqinida uchib ko‘tarilganidan bir necha daqiqa o‘tib halokatga uchragan. Layner shifokorlar yotoqxonasiga qulab tushgan. Parvozni amalga oshirgan Air India aviakompaniyasi ma’lumotlariga ko‘ra, samolyot bortida 242 kishi bo‘lgan.
Faqat bitta yo‘lovchi omon qolgan. Keyinchalik erkakning aytishicha, samolyot havoga ko‘tarilganidan so‘ng “go‘yo havoda to‘xtab qolgandek bo‘lgan”, so‘ngra tibbiyot kolleji yotoqxonasiga qulab tushgan. So‘nggi ma’lumotlarga ko‘ra, qutqaruvchilar tomonidan topilgan aviahalokat qurbonlarining umumiy soni 275 kishini tashkil etdi.
Izoh (0)