Ko‘kdaladagi portlash: voqea joyidan kechikkan reportaj

Qashqadaryo viloyatining Ko‘kdala tumanidagi aholiga suyultirilgan gaz ballonlari tarqatish shoxobchasida portlash sodir bo‘ldi. Masʼullarga ko‘ra, mazkur portlash 4 kishining umriga zomin bo‘lgan. Voqea joyida bo‘lib, tafsilotlarni o‘rgangan “Daryo” jurnalistining maʼlum qilishicha, rasmiylar o‘limlar sonini ochiqlashda jamoatchilikni chalg‘itmoqda.

“O‘zimiz tanigan odamlardan besh kishi o‘ldi”

“Daryo” jurnalisti bilan suhbatda bo‘lgan aholi vakillarining aytishicha, portlash ushbu hududda yashovchi, ular tanigan va bilgan besh kishining o‘limiga sababchi bo‘lgan.

Shaxsan o‘zimiz tanigan va bilgan besh kishi portlash oqibatida o‘ldi. Biri gaz tarqatish shoxobchasining boshlig‘i bo‘lsa, qolgan to‘rt nafar marhum shoxobcha yonidagi restorandagi odamlar bo‘lgan. Shu kuni restoran egasi xotini va bolalari bilan Toshkentda dam olishda bo‘lgan. Yong‘inda restoranga vaqtincha qarab turgan onasi, oshpaz, restoran boshqaruvchisi va ofitsiant bola vafot etgan, deydi ismi sir qolishini so‘ragan suhbatdoshlardan biri.

Aholining bu gapini ushbu restoran egalaridan biri Ulug‘bek Hasanov ham tasdiqladi.

Ammam banket zalida uxlab yotgan joyida yonib ketgan va o‘sha joyda jon bergan. Oshpaz bobom va ishboshqaruvchi esa karovotda yotgan bo‘lgan. Ofitsiant bola va ayni paytda komada yotgan marhum ammamga qarab yuruvchi qiz esa oshxona atrofida bo‘lgan. Ammam, oshpaz, ishboshqaruvchi va ofitsiant bola voqea joyida vafot etgan bo‘lsa, ammamga qarab yuruvchi qiz yong‘indan qochib chiqib, o‘z oyog‘i bilan shifoxonaga borgan. U ayni paytda komada. Shifokorlar ahvoli og‘ir deyishmoqda,  deydi Ulug‘bek Hasanov.

Yosh qiz komada, bosh shifokor buni yashirmoqda

Ko‘kdala tuman tibbiyot birlashmasi boshlig‘i Odil Shaymanovning “Daryo”ga bildirishicha, 19-iyul holatiga ko‘ra tuman shifoxonasi 7 nafar bemor qolgan.

Tuman tibbiyot birlashmasiga 15 nafardan ko‘proq odam murojaat qilgan. Ayni kunda shifoxonada 7 nafar bemor qolgan. Shundan bir nafarining ahvoli og‘ir bo‘lib, shifoxonaning jonlantirish bo‘limida qolayotgan bo‘lsa, qolgan 6 nafari kuyish bo‘limiga o‘tkazilgan. Kuyish bo‘yicha Toshkent, Samarqand va Qarshi shahridan mutaxassislar jalb qilingan. Har bir bemorga bir nafardan shifokor biriktirilgan. Davolash davlat tomonidan amalga oshirilmoqda. Viloyat hokimi tomonidan dori-darmonlar olib berildi, deydi Odil Shaymanov.

Masʼul jurnalistning savoliga javob berar ekan, ayni paytda shifoxonada qolayotgan bemorlar gaz tarqatish shoxobchasining ishchilari ekanini aytdi.

Ular (shifoxonada qolayotgan bemorlar) asosan ichkaridagi xodimlar bo‘lgan. Shu sabab ularning kuyish darajasi ko‘proq, 70-80 foiz. Tashqarida o‘tib-qaytayotgan odamlarga ham tekkan. Ularga hech narsa qilmagan. Ular shifoxonadan ketgan. Hozirda bizda qolgan bemorlarning barchasi yoshi katta erkaklar, qolgan barchaga javob berdik, deydi tumanning bosh shifokori.

Odil Shaymanov Ulug‘bek Hasanov aytgan bemorni yaʼni yong‘in sodir bo‘lgan paytda oilaviy restoranda bo‘lgan, asli shahrisabzlik Dilnoza ismli bemorni yashirmoqda.

Portlashda kuyish jarohatini olgan va ayni paytda komada qolayotgan Dilnozaning otasi Abduhakim Xalilovning “Daryo”ga bildirishicha, qizi o‘sha kuni soat 15:30 larda qo‘ng‘iroq qilib, yong‘in haqida aytgan.

O‘sha kuni qizim menga telefon qilib, “dadajon tez keling”, dedi. Nima bo‘ldi desam, “yong‘in bo‘ldi, yong‘in bo‘ldi”, dedi-da telefonni o‘chirdi. Shundan so‘ng yarim soat o‘tgach, opasiga telefon qilib, oyisini so‘ragan ekan. Bir gaplashay degan ekan. Men o‘sha kuni shifoxonaga soat 18:00 larda keldim. Shu kuni qizimni ko‘rolmadim. Ertasi kuni ko‘rdim. Ahvoli og‘ir, 100 foiz kuyish deyishdi, deydi Dilnozaning otasi.

Odamlar sog‘liqni saqlash vaziridan minnatdor

Yaqinlari sog‘lig‘idan xavotir olib, shifoxona binosida to‘plagan fuqarolarning “Daryo”ga bildirishicha, ayni paytda portlashdan jabrlangan bemorlarning 8 nafari shifoxonaning jonlantirish bo‘limida qolmoqda. Yengilroq tan jarohati olganlar esa palatalarda.

Qolgan bemorlarning ahvoli ularga nisbatan yaxshi bo‘lgani bois, ular palatalarga olingan. Ammo bemor yaqinlarimiz oldiga kiritishmayapti. Bu yaxshi albatta. Sababi ularga hozir tinchlik kerak. Tez sog‘ayib olishlari uchun biror infeksiya yuqtirib olmasliklari juda muhim, deydi o‘zlarini tanishtirishsa bemor yaqinlariga jabr bo‘lishidan qo‘rqqan fuqarolar.

Bemorlar yaqinlarining aytishicha, sog‘liqni saqlash vaziri Asilbek Xudoyorov shaxsan ular bilan muloqotda bo‘lib, bemor haqida maʼlumot berib turibdi.

Baraka topsin shaxsan vazirning o‘zi yaqinlarimizning ahvoli haqida aytib, vaziyatdan xabardor qilib turibdi. Toshkent va Samarqanddan shifokorlar chaqirtirib, yordamini ayamayapti. Biz bundan xursandmiz, deydi ayni paytda eri shifoxonaning jonlantirish bo‘limida qolayotgan ayol.

“Zapravka”da ishlovchi, portlash oqibatida kuyish jarohatini olgan yana bir bemorning opasi ukasining ahvoli haqida shaxsan vazirning o‘zi unga axborot berganini qo‘shimcha qildi.

Bosh vazir o‘rinbosari Ramatov ham voqea joyiga borgan

Bosh vazirning birinchi o‘rinbosari Ochilboy Ramatov Ko‘kdala tumanida bo‘lib, yong‘in sodir bo‘lgan gaz shoxobchasi va oilaviy restoranga borgan. Bu haqda jurnalistga restoran egalariga yaqin manba maʼlum qildi.

Bosh vazir o‘rinbosarining yong‘in oqibatida kuyib kul bo‘lgan restoranga kelganini tasdiqlagan yana bir manbaning aytishicha, amaldorning hududga tashrifi bir necha masʼulning ishdan olinishiga, katta ehtimol bilan qamalishiga ham sabab bo‘lgan.

Ramatov shaxsan voqea joyiga kelib, holatni o‘zi o‘rgangan. Shu kuni yig‘ilish qilib, ko‘pchilikni ishdan ham olgan. Ammo aynan kimlarni ishdan oldi bunisi bizga qorong‘i, deydi ismi sir qolishini so‘ragan suhbatdosh.

Tadbirkor 15 milliard so‘mga yaqin zarar ko‘rganini aytmoqda

2025-yilning 16-iyul kuni soat taxminan 14:30 da Ko‘kdala tumanidagi aholiga tarqatiladigan suyultirilgan gaz ballonlarini “zapravka” qiluvchi gaz shoxobchasida jamoatchilikka nomaʼlum holatda chaqnash sodir bo‘lgan. Oqibatda gaz ballonlari portlay boshlagan. 30 tonna og‘irlikdagi, sig‘imi 60 tonnani tashkil qiluvchi gaz saqlovchi bochka restoranga uchib tushishi oqibatida oilaviy restoranda ham kuchli yong‘in boshlangan.

O‘sha kuni soat 14:30, 14:35 larda onam telefon qilib, tez yetib kel restoranda yong‘in bo‘lyapti, “zapravka” portladi dedi. Yetib kelsam, ko‘chada odamlar ko‘p, ichkarida esa odamlar yonyapti. 1,5 kilometr gradus bo‘ylab, aylana holatda yong‘in sodir bo‘lmoqda. Mayda gaz ballonlari yo‘lning narigi tomonidagi issiqxonalarga ham otilmoqda. Olov yo‘lda o‘tayotgan Damas’larga ham o‘tdi, katta Fura’larning tentlari ham yona boshladi, deydi oilaviy restoran egalaridan biri Ulug‘bek Hasanov.

Tadbirkor Hasanovning aytishicha, ushbu oilaviy restoran qurilishiga 15-16 milliard so‘mdan ortiq mablag‘ sarflangan.

Restoranimiz nafaqat tumanda, viloyatda ham o‘z o‘rniga ega restoranlardan biri edi. O‘tgan safar viloyatimizga aynan tumanimizga tashrif buyurgan viloyat hokimlari ham aynan bizning restoranimizda mehmon bo‘lgandi, deydi u.

Eslatib o‘tamiz, Ko‘kdaladagi gaz zapravkadagi portlash yuzasidan jinoyat ishi qo‘zg‘atilgan. Jinoyat ishi doirasida sud-tibbiy, yong‘in kelib chiqishini aniqlash bo‘yicha sud-kimyoviy, biologiya, kriminalistika va yong‘in texnikaviy ekspertizalari tayinlangan. Rasmiy maʼlumotlarga ko‘ra hodisa oqibatida 4 kishi vafot etgandi. Shu bilan birga, 15 kishi jarohatlangani aytilmoqda. Vafot etganlar oila aʼzolariga 100 mln so‘mdan, jarohat olganlarga 50 mln so‘mdan moddiy yordam berilgan.