Qashqadaryoning Ko‘kdala tumanidagi gaz zapravkada sodir bo‘lgan portlash yuzasidan jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.
16-iyul kuni “Oltindala” MFYda joylashgan aholiga gaz to‘ldirish stansiyasi hududida yoqilg‘i saqlash rezervuarida chaqnash va undan so‘ng yong‘in kelib chiqqandi. 4 ta yong‘in-qutqaruv ekipaji soat 14:45 da voqea joyiga yetib borib, yong‘in soat 15:35 da o‘chirilgandi. Hodisa oqibatida 4 nafar fuqaro vafot etgan.
Holat yuzasidan Jinoyat kodeksining 205 (hokimiyat yoki mansab vakolatini suiiste’mol qilish) va 259 (yong‘in xavfsizligi qoidalarini buzish) moddalari bilan jinoyat ishi qo‘zg‘atildi. Jinoyat ishi doirasida sud-tibbiy, yong‘in kelib chiqishini aniqlash bo‘yicha sud-kimyoviy, biologiya, kriminalistika tegishli soha mutaxassislari ishtirokida yong‘in ko‘lami va yetkazilgan zararlarning miqdorini aniqlash ishlari olib borilmoqda.
Ayni paytda tergov harakatlari davom etmoqda.
2024-yilning dekabrida Farg‘ona shahridagi avtomobilga yonilg‘i quyish shoxobchasida portlash sodir bo‘lgandi. Buning oqibatida bir nafar ayol va uning 4 va 2 yoshli farzandlari hamda 8 yoshli jiyani vafot etgandi. Yana 9 kishi turli darajada kuyish tan jarohatlari olgan. Portlash oqibatida atrofdagi 18 ta avtomobil va 5 ta ko‘p qavatli uy binosi, jumladan AYOQSH infratuzilmasiga jami 4,78 milliard so‘mlik moddiy zarar yetkazilgan. Ushbu portlash ishi bo‘yicha 3 kishi qamaldi.
Izoh (0)