“Dunyo” axborot agentligi Pokiston va Rossiyada og‘ir ahvolda qolgan ikki o‘zbekistonlik vatanga qaytarilganini maʼlum qildi.
Xabar qilinishicha, Pokistondagi O‘zbekiston fuqarosi E.X. mamlakat elchixonasiga murojaat qilib, og‘ir ijtimoiy vaziyatga tushib qolganini, vaqtinchalik turar joy va kundalik ehtiyojlar uchun zarur mablag‘ga ega emasligini maʼlum qilib, yordam so‘ragan.
Uning murojaati elchixona tomonidan nazoratga olinib, qisqa fursat ichida zarur konsullik-huquqiy va moddiy yordam ko‘rsatish bo‘yicha choralar ko‘rildi. Unga O‘zbekistonga qaytish uchun tegishli konsullik guvohnomasi rasmiylashtirildi va elchixona xodimlari hamda homiylar ko‘magida aviachipta xarid qilindi.
Fuqaro kuni kecha Uzbekistan Airways aviakompaniyasining Islomobod—Toshkent aviareysi bilan vatanga qaytarildi.
Rossiyadaga fuqaroga ham yordam ko‘rsatildi
Maʼlum qilinishicha, Chelyabinsk viloyati Kishtim tumanida joylashgan “Russkiye pryaniki” korxonasida vaqtincha ishlash uchun borgan o‘zbekistonlik S.A. Bosh konsulxona diplomatlari bilan uchrashuv chog‘ida moddiy tomondan qiyin ahvolda qolgani sababli doimiy yashash manziliga yetib olishi uchun yordam so‘ragan.
O‘tkazilgan suhbat davomida maʼlum bo‘lishicha, S.A. shu yil may oyida tashkillashtirilgan tartibda mazkur korxonaga ishga kelgan. Uning Chelyabinsk viloyatiga yetib kelguniga qadar yo‘l xarajatlari, yotoqxona va boshqa ko‘rinishdagi to‘lovlar ish beruvchi tomonidan amalga oshirilgan.
Fuqaro vaqtincha mehnat faoliyatini amalga oshirish uchun ruxsat beruvchi patentni rasmiylashtirish maqsadida uch marotaba imtihon topshirgan. Ammo rus tilini bilish darajasini beruvchi sertifikatni rasmiylashtira olmagani sababli Rossiyada noqonuniy huquqiy maqomda qolgan.
Uni O‘zbekistonga qaytarish uchun Yekaterinburg shahriga olib kelindi va vaqtincha boshpana bilan taʼminlandi. Shundan so‘ng O‘zbekiston diplomatlari va faol vatandoshlar ko‘magida Yekaterinbur—Toshkent aviareysiga chipta xarid qilib berildi.
19-iyul kuni Yekaterinburg—Toshkent yo‘nalishi bo‘yicha samolyotda O‘zbekiston Bosh konsulxonasi xodimlari tomonidan doimiy yashash manziliga kuzatildi.
O‘zbekistonga qaytarilayotgan fuqarolar
2025-yilning boshlarida Rossiyaning Tiva Respublikasi Oq Dovurak shahrida vaqtincha ishlayotgan to‘rt nafar O‘zbekiston fuqarosi vatanga qaytarildi. Fuqarolarning yashash joyida sodir bo‘lgan kuchli yong‘in natijasida ularning hujjatlari, shu jumladan, pasportlari yo‘qolgan.
27-fevral kuni Makkada og‘ir kasallikka chalingan o‘zbekistonlik vatanga qaytarildi. Fevral oyi oxirida Rossiyada ikki bolasi bilan qiyin vaziyatda qolgan ayol O‘zbekistonga qaytarildi.
2025-yil 5-mart kuni Rossiyaning Vladivostok shahrida og‘ir tan jarohati olgan O‘zbekiston fuqarosi vatanga qaytarildi. Mart oyining o‘rtalarida Novosibirskdagi Bosh konsulxonasi ko‘magida Rossiyaning Saxa respublikasi Neryungri shahrida qiyin hayotiy vaziyatga tushib qolgan ona va uning to‘rt nafar farzandi O‘zbekistonga qaytarildi. 17-mart kuni ota-ona qaramog‘isiz qolgan 10 nafar voyaga yetmagan bola Qozog‘istondan O‘zbekistonga qaytarildi. Shuningdek, Rossiyada ota-ona qaramog‘isiz qolgan 30 nafar bola O‘zbekistonga qaytarildi.
14-iyun kuni Turkiyada o‘gay otasi jinsiy tajovuz qilgan o‘zbekistonlik qiz vatanga qaytarildi. 20-iyunda esa Ummonda tutqunlikda saqlangan ayol bolalari bilan O‘zbekistonga qaytarildi.
Roppa-rosa 1 oy avval, 21-iyunda Erondagi 60 ga yaqin O‘zbekiston fuqarolari Turkmaniston orqali vatanga qaytarilgan.
Izoh (0)