Energetika vazirligi Qashqadaryo viloyatidagi “Talimarjon” issiqlik elektr stansiyasida (IES) yong‘in yuz bergani haqida ijtimoiy tarmoqlarda tarqalgan xabarlarni rad etdi.
Qayd etilishicha, stansiyada tabiiy gazdan foydalaniladi. Bu esa bug‘-gaz qurilmalariga yoqilg‘i yetkazib beruvchi quvurlardagi filtrlarda chang o‘tirib qolishiga olib keladi. Aynan changlarning bir-biriga ishqalanishi natijasida alangalanish yuzaga kelgan. Bu holat yong‘in sifatida noto‘g‘ri talqin etilgan.
Alangalanish oqibatida hech kim jabrlanmagan va filtrlarni tozalash, texnik xizmat ko‘rsatish ishlari olib borilmoqda, — deyiladi xabarda.
Texnik xizmat ko‘rsatish ishlari yakunlangach, bug‘-gaz qurilmasi qayta ishga tushirilishi rejalashtirilgan.
Eslatib o‘tamiz, 2021-yil 20-yanvar kuni “Yangi Angren” issiqlik elektr stansiyasining profilaktika choralarini ko‘rish uchun to‘xtatilgan 5-energiya blokida chang-ko‘mirli havo aralashmasining portlashi sodir bo‘lgan, portlash oqibatida uch kishi halok bo‘lgan va yana uch kishi jarohat olgandi. Energetika vazirligi ularning oila a’zolariga moddiy va ma’naviy yordam ko‘rsatilganini ma’lum qilgandi.