Joriy yilning 7-iyul kuni “Fitch Ratings” xalqaro reyting agentligi tomonidan “KAFOLAT sug‘urta kompaniyasi” AJning moliyaviy barqarorlik reytingi “B+” darajasida tasdiqlandi, prognoz esa “salbiy”dan “ijobiy”ga oshirildi.
Ushbu reyting ko‘rsatkichiga erishish kompaniyaning so‘nggi yilda erishgan moliyaviy barqarorligi, kapitallashuv darajasining oshishi va tavakkalchiliklarni boshqarishdagi ijobiy o‘zgarishlarni e’tirof etadi.
Reyting ko‘rsatkichi quyidagi muhim omillarning yaxshilanishi natijasida “ijobiy” prognozga o‘zgartirildi:
- Kompaniya ustav kapitalining 90 mlrd so‘mdan 216 mlrd so‘mga oshirilishi bilan kapital pozitsiyasi mustahkamlangani;
- Reyting agentligining PRISM modeli bo‘yicha hisoblangan to‘lov qobiliyati ko‘rsatkichi “Yetarli” darajada baholanishi;
- Zararlilik darajasining muqobillashuvi va rentabellik ko‘rsatkichlarining oshishi;
- Moliyaviy barqarorlik va xavflarni boshqarish darajasining yaxshilanishi;
- Moliyaviy hisobotlarni “MHHS 17” talablariga mos ravishda shakllantirishga bosqichma-bosqich qadam qo‘yilayotgani.
Xalqaro reyting agentligi tahlilchilarining ta’kidlashicha, “KAFOLAT sug‘urta kompaniyasi” AJning umumiy biznes profili yanada barqarorlashgan. Ayniqsa e’tiborga molik jihati bu kompaniyaning tabiiy ofatlardan sug‘urtalash va qayta sug‘urta qilish amaliyotida moliyaviy tayyorlik darajasidir. Aytish joizki, joriy yilda Kompaniya kapitaliga ta’sir ko‘rsatuvchi eng yuqori ehtimoliy yo‘qotishlarni baholash tizimi — PML (Probable Maximum Loss) zararlarning maksimal darajasini modellashtirish dasturining joriy etilishi muhim qadamlardan bo‘ldi. “KAFOLAT sug‘urta kompaniyasi” AJ O‘zbekiston sug‘urta bozorida o‘zining PML ichki dasturini joriy etgan sanoqli sug‘urta kompaniyalaridan biri hisoblanadi.
Shuningdek, sug‘urta zaxiralarining yetarlilik darajasini aniqlashda xalqaro tajribada keng qo‘llaniluvchi deterministik va stoxastik modellar yordamida yo‘qotishlarning eng yuqori ssenariylari stress-testdan o‘tkazildi. Amalga oshirilgan ushbu yangi ko‘lamdagi aktual tahlillar Agentlik tomonidan ijobiy baholandi.
“Fitch Ratings” xalqaro reyting agentligining “ijobiy” prognozi “KAFOLAT sug‘urta kompaniyasi” AJning moliyaviy holati mustahkamlanganligini, diversifikatsiya va biznes modeli islohoti yo‘lida ijobiy natijalarga erishilganini tasdiqlaydi. Shu bilan birga kelgusida kompaniya reytingining yanada oshishiga ishonch bilan harakat qilayotganini anglatadi.
“KAFOLAT sug‘urta kompaniyasi” AJ uchun bu nafaqat xalqaro e’tirof, balki mamlakat sug‘urta bozoridagi nufuz va ishonchning yanada ortishi demakdir. Kompaniya o‘z mijozlariga moliyaviy himoyaning mustahkam poydevorini yaratishda davom etmoqda.
Batafsil ma’lumot bilan ushbu havola orqali tanishishingiz mumkin.
Reklama huquqi asosida.
Izoh (0)