Fitch xalqaro reyting agentligi O‘zbekiston kredit reytingini “BB-” dan “BB” darajasiga oshirgani haqida xabar berilgandi. Prezident administratsiyasi rahbari Saida Mirziyoyeva bu haqda fikrlarini bildirdi.
“Bu 2018-yildan beri kuzatilayotgan birinchi o‘sish holatidir. Fitch hisobotida mamlakatimizda amalga oshirilayotgan islohotlar, dunyodagi o‘zgaruvchan va noaniq vaziyatlar sharoitida iqtisodiy barqarorlikni saqlash yo‘lidagi yutuqlar alohida e’tirof etilgan.
Avvalroq S&P va Moody’s reyting agentliklari ham O‘zbekiston suveren kredit reytingi bahosi kutilmasini ‘barqaror’dan ‘ijobiy’ga oshirgan edi. Bu xalqaro hamkorlarimiz uchun muhim signal bo‘lib, kelgusida yanada ko‘proq xorijiy sarmoyalarni jalb etishga xizmat qiladi.
Prezidentimiz boshchiligidagi jamoa xalqimiz farovonligini yuksaltirishga qaratilgan tizimli islohotlarni davom ettiradi. Yo‘limizdan to‘xtamaymiz!”, deb yozgan Saida Mirziyoyeva.
Moody’s xalqaro reyting agentligi tomonidan 13-iyun kuni O‘zbekiston suveren kredit reytingiga bag‘ishlangan navbatdagi hisobot e’lon qilindi. Unga ko‘ra, respublikaning kredit reyting bahosi “Ba3” (“BB-”) darajasida tasdiqlanib, reyting kutilmasi “barqaror”dan “ijobiy”ga oshirildi.
Moody’s tomonidan 2025-yilning boshidan beri 11 ta mamlakatning suveren kredit reytingi bahosi yoki kutilmasi pasaytirilgan hamda 12 ta mamlakatniki oshirilgan. Hisobotda O‘zbekiston suveren kredit reytingi kutilmasining “ijobiy”ga oshirilishi amalga oshirilayotgan institutsional islohotlar orqali iqtisodiy siyosat samaradorligi va institutlar sifati yaxshilanishi bilan bog‘liq ekanligi ta’kidlangan.
S&P Global Ratings xalqaro agentligi O‘zbekistonning suveren kredit reytingi prognozini “barqaror” darajadan “ijobiy” darajaga yaxshilagandi.
Jahon banki “Global iqtisodiy istiqbollar” hisobotini eʼlon qilgan edi. Hisobotda Yevropa va Markaziy Osiyo uchun tendensiyalar, prognozlar va xavflar tahlil qilinadi.
Prognozlarga ko‘ra, O‘zbekiston yalpi ichki mahsuloti o‘sishi 2024-yil oxirida 6 foizni tashkil etdi.
Kelgusi yillar uchun prognoz
Jahon banki prognozida maʼlum qilinishicha, O‘zbekiston iqtisodiyoti 2025-yili 5,8 foiz, 2026-yili esa 5,9 foiz o‘sadi. Taʼkidlash lozim, bu — Yevropa va Markaziy Osiyo mintaqasidagi davlatlar orasida eng yuqori ko‘rsatkichlardan biri hisoblanadi.
2024-yilning oktyabr oyida ham O‘zbekiston iqtisodiyoti 2025 va 2026-yillarda mos ravishda 5,8-5,9 foiz o‘sishi haqida maʼlum qilingandi.
Izoh (0)