“O‘zbekgidroenergo” AJ prezident topshirig‘iga ko‘ra, mamlakatga to‘g‘ridan to‘g‘ri investitsiya mablag‘larini jalb qilish, ya’ni davlat kafolatisiz kredit shartnomalar tuzish uchun Xitoy Xalq Respublikasining Bank of China va CITIC banklari bilan hamda Amerika qo‘shma shtatlarining xalqaro taraqqiyot agentligi USAID’ning grant mablag‘larini jalb qilish uchun muzokaralar olib bormoqda. Bu haqda “Daryo”ga tashkilot axborot xizmati rahbari Ravshan Boyqulov xabar berdi.
Ta’kidlanishicha, “O‘zbekgidroenergo” AJ kredit reytingi O‘zbekistonda ishlab chiqaruvchi tashkilotlar orasida TOP uchlikda qolmoqda.
“Tashkilotimiz 2024-yilda ham jahonda yetakchi reyting agentliklaridan biri hisoblangan Fitch Ratings xalqaro reyting agentligining “BB-” barqaror darajadagi xalqaro kredit reytingini saqlab qoldi. Ma’lumki, joriy yilda berilgan reyting o‘tgan yilning moliyaviy tahlili natijalari, ya’ni 2023-yilning natijalari sarhisobiga berilgan baho hisoblanadi. Fitch Ratings xalqaro reyting agentligi tashkilotimizning nafaqat moliyaviy-iqtisodiy ko‘rsatkichlari mustahkam o‘sib borayotganiga, balki biznes strategiyasining samaradorligiga ham amin bo‘ldi”, deydi Ravshan Boyqulov.
Bildirilishicha, jamiyat kredit reytingini bir necha yillardan buyon barqaror darajada saqlab kelayotganligi nafaqat uning investision muhiti jozibadorligi, qolaversa, boshqaruvdagi samaradorligiga ham bog‘liq.
“Mazkur daraja jamiyatni jahonning mashhur investorlar bozorlariga aniq va ravshan biznes strategiyasiga, shaffof moliyaviy hisobotlariga, shuningdek, kuchli korporativ boshqaruv tizimiga ega birinchi o‘zbek ishlab chiqaruvchi korxonasi sifatida tanitib bormoqda. Reyting kelgusida “O‘zbekgidroenergo” AJning iqtisodiy barqarorligini yanada oshirishga xizmat qiladi hamda investitsiya loyihalarini amalga oshirishda xorijiy kreditlarni davlat kafolatisiz to‘g‘ridan to‘g‘ri jalb qilish imkoniyatini beradi”, deydi mas’ul.
Izoh (0)